Pynlong ka CBC ia ka Jingai jingtip halor ki Khla Wait ka Ri bad ban bam ia ki jingbam kiba tei

Shillong Lber 02: Ka Central Bureau of Communication (CBC), Tnad Information and Broadcasting, Sorkar India, Regional Office, (MT Region), Shillong ha ka sngi Thohdieng, kala pynlong ia ka Photo Exhibition bad ka Jingai jingtip kaba ar sngi halor ki nongiakhun laitluid jong ka thaiñ shatei lammihngi bad ka jingbam ia ki bam kiba tei, ha ka Ramakrishna Mission Higher Secondary School, Mylliem.

Ha kane ka jingialang la pyni ia ka jingiakhun jinglaitluid jong ka India lyngba ka jingpyni ia ki dur, ka jingai jingtip kaba thmu ban kyntiew ia ka jingbam ia ki jingbam kiba tei bad pyni ia ki sienjam jong ka sorkar ban iakhun ia ka jingduna ka bam kaba tei da kaba kyntiew ia ki rukom bam kiba tei.

Ka DHEO, East Khasi Hills, Kong O Sumer, kala batai sani shaphang ka bam tynrai na ka bynta ka jingtei ia ka met, ka jingsan ka jabieng bad ka jingiakhun ia ka jingduna snam (anaemia). Kala ban jur halor ka jingkyntiew ia ki jingtei met bad ka jingbam ia ka bam kaba bha.

Ka Kong Icydora Nongrum, Principal jong ka skul Ramakrishna Mission, kala pynpaw ka jingsngewnguh ia ka CBC, Shillong kaba la pynlong ia ka Exhibition bad ka ong ba kane kan iarap ban ai jinghikai ia ki briew bad khamtam ia ki khynnah pule, shaphang ka jinglen lade kaba khraw jong ki Nongiakhun laitluid na ka bynta ka ri.

Haba kren shaphang ka bam kaba tei, kala kyntu ia ki khynnah pule ban pynneh ia ka rukom bam kaba ryntih bad ban pynthikna ba ki bam kumba 5 jait ki bam ha ka shi sngi ba kynthup ia ka carbohydrate, ki protein, ki shanadai, ki jingbam ba shna na ka dud, ki jhur jyrngam.

Ha kane ka prokram kaba ar sngi, la pynlong ia ki jingiakop bapher bapher hapdeng ki khynnah pule jong ka skul bad la sakhi ia ka jingiashim bynta shitrhem ha ka jingiakop rwai, jingiakob kyntip bad ka jingdro dur bad ha ka sngi kut, la sam ia ki khusnam sha ki nongjop.