Shillong, Rymphang 23 : U Myntri Rangbah ka Jylla Conrad K Sangma ha ka sngi Thohdieng, ula ong ba ka Sorkar Jylla kala buddien bad ka Sorkar Pdeng ha kaban pyntreikam ia ka Reservation Policy hapoh ka Eklavya Model Residential Schools (EMRS) hapoh ka jylla
Haba jubab ia ka mat iatai bala wanrah da u MLA ka VPP na Nongkrem, u Conrad ula ong ba ha ka jingiakynduh, u Myntri ka Tribal Affairs ula pynpaw ba yn sa mynjur ia ka jingtreikam ka Reservation Policy na ka bynta ka Jylla ha ki EMRS.
“Hooid, ngi khlem ioh (jingkular) da ka jingthoh. (Kumta), ngi dang buddien ia kane ka kam bad ka Sorkar Pdeng, namar da ki hajar ki kam kin mih (da ka jingseng ia ki skul EMRS)” ula ong.
Hynrei u Myntri Rangbah ula ong ba ka jingpynsangeh ia ka jingiaid ka jingtrei ka lah ban ktah ia ka kam ia ka jingiakren jong ka Sorkar Jylla bad ka Sorkar Pdeng.
Shuwa kane, haba jubab ha ka kynta kylli jingkylli halor kane kajuh ka kam, u Myntri ka Tnad Pule Puthi Rakkam A Sangma ula ong ba ka Reservation Policy kan ym treikam satia ha ki EMRS. “Hynrei, ngin sa buddien ia ka kam bad ngi la dep thoh la ka Reservation Policy ka lah ban treikam ne em tangba ngim pat ioh jubab na ka Sorkar India”.
Haba jubab bynrap, u Myntri Rangbah ula pyntip ba ula dep iakren bad u Myntri ka Tnad Tribal Affairs ba ka jingpyntrei ia ki EMRS hapoh ka Jylla ki long kiba iaid suki bha.
Ula ai jingmut ia u Myntri halor ka jingdonkam ban ailad ia ka Sorkar Jylla bad ia ki agency jong ka, ba kin pyntrei ia ki project namar kan kham bha shibun khamtam ha kaban weng ia ki jingeh ba iakynduh bad ki trai shnong.
Ia mynta, ki project ki dei kiba la pyntrei da ki artylli ki agency bala jied da ka Sorkar Pdeng lyngba ka jingkhot tender.
“Kumta, ngi dang iai bteng ban buddien ia kane ka kam bad ngi kyrmen ba ngin ioh ia ka jubab kaba bha” ong u Conrad.
Halor ka jingslem ban pyndep ia ki jingtei jong ki EMRS, u Myntri ula ong ba ka jingpyntrei ia ki project ha kiba bun ki block ka long kaba jynjar bha namar ka jingeh ha ka jaka khamtam ba don ka kyndon jong ka Ministry ba ong ba ia ka jaka dei ban ai ei khlem kano kano ka jingsiew.
“Ka jingeh ban ioh jaka ka dei kaba don ha kiba bun ki block. Hadien ka jingialang bishar kam, ngi la lah ban iohi ia katto katne ki sngi kiba la sdang pyntrei bad ngi khmih lynti ba yn pyndep noh kloi ia ki” ula bynrap.
