Shillong, Feb 12: Da ka jingiatreilang ban ai jingsumar kaba paka ia kiba pang bampong ne Cancer ha Meghalaya, ka sorkar jylla ryngkat ka jingiatreilang bad ka Apollo Telemedicine Networking Foundation (ATNF), kala pynlong ia ka Meghalaya Cancer Conclave 2024, halor ka phang “Close the Care Gap.”
Ha kane ka Conclave kaba ar sngi kaba la long ha Courtyard Marriott Shillong, la pyniaid da ka Myntri ka koit ka khiah Kong Ampareen Lyngdoh, da kaba wanrah lang ia baroh kiba donbynta kiba kynthup ia ki oncologists, cancer researchers, scholars, ko seng trei mon sngewbha, ko heh ophisar bad ki nongmihkhmat na ki lad pathai khubor.
Ka jingthmu jong kane ka conclave ka long ban iatai halor ki buit treikam kiban weng ia ki jingeh ha kaba iadei bad ka jingai jingsumar ia ka jingpang bampong.
Haba kren ha ka jingialang u Sampath Kumar uba long u Principal Secretary – Dept. of Health & Family Welfare, ka sorkar jylla ula banjur ia ka jingdonkam ban don ia ki lad ai jingsumar kiba biang.
“Haba ngi ialum kumne ha ka Meghalaya Cancer Conclave, ka jingthmu ka jong ngi ka long ban thaw ia ki lad ki lynti ka ban long kyllum ha ka jingai jingsumar ia kiba pang bampong , da kaba trei shitom, iasam ia ki jingtip bad ban saindur ia ka jingiatehlok. Ngi khmih lynti ba kan ym dei eh tang ka jingiakren hynrei kan wanrah ia ka jingkylla ha kaban sumar ia kiba pang bampong ha Meghalaya” ong u Kumar.
U Prem Anand, Chief Business Officer, Apollo Telemedicine Networking Foundation, ula pynpaw ia ka jingkongsan jong ka jingiatreilang ban iakhun pyrshah ia ka bampong.
“Ban ialeh pyrshah ia ka bampong ka long kaba kongsan bha ban don ia ka jingiatreilang da ka jingiatylli. Ka ATNF ka sngewsarong ban ieng lang bad ka sorkar Meghalaya ha kane ka sienjam kaba kongsan bha. Da kaba iatreilang ngin ia iaid lang ym tang ban shimkhia ia ki jingeh hynrei ban prat lynti na ka bynta ka lawei ban ym don kiban shah ieh shadien ha ka jingiakhun ia ka bampong” ula ong.
Ha kane ka jingialang la iatai sani halor ka jinglap dang kloi ia ka jingpang, ban ai ka jingsumar kaba paka, ka jinglong jong kane ka jingpang ha ka jylla, ban pyndonkam ia ki kor teknoloji ha kaban khmih bniah, ka jingai jingkyrshan bad ka jingai jingsumar, ban wad bniah ia ka jingpang bampong bad ka kamram ki lad pathai khubor ha ka jingai jingsumar bad ka jinglah ki nongpang ban jop ia kane ka jingpang.
Ia ka Meghalaya Cancer Care or ‘Meg Can Care’ project, la plie ha u snem 2023 da u Myntri Rangbah ka jylla u Conrad K Sangma, ha ka jingiatreilang bad ka Apollo Telemedicine Foundation and World Economic Forum, kaba pyni ia ka jingshim jingkitkhlieh ka sorkar ban khmih bad ban lap dang kloi ia ka jingpang.
