Shillong, Rymphang 07 : Ka kyrtong MP ka NPP na Shillong bad Myntri Sorkar Kong Ampareen Lyngdoh ha ka sngi Balang kala ong ba ka Party ka dang pynkhreh ban pyllait noh ia ka manifesto ban pan ia ka jingkyrshan u paidbah ka Jylla ha ka elekshon Lok Sabha ban wan.
“Nga dang ap ia ki kot ki sla (manifesto) ka ban pyni lynti ia nga halor kiei ki mat ba ngan ioh shimkhia kum ka kyrtong” ong ka kong Ampareen haba iakren bad ki nongthoh khubor.
Kane ka Nongthaw Ain bala saw samoi ka East Shillong kala ong ba kala trei shitom bha bad kala iaid kylleng ki jaka jong ka Constituency ban sngewthuh ia ki ishu bad ki jingangnud jong u paidbah ha manla ki shnong.
“(Nga kwah ban tip) halor ka kam pynroi pynpar, kiei ki kam kiba donkam kyrkieh ha baroh ki 36 tylli ki constituency namar nga la don lypa ia ki kam bala pynbeit ia kiei kiba nga dei ban leh lada nga shah jied kum ka MP” kala ong.
Haba pynpaw ia ka jingangnud ban wanrah ia ka jinglong kawei hapdeng ki nongthep vote ka Shillong parliamentary seat, ka kong Ampareen kala ong “Ka perdentage jong ki vote kiba nga lah ban don, ka vote share ba ka party ka ioh ki long ki dak ba kongsan kiban pyni la ngi lah ne em ban wanrah ia ka jingiadei ba iajan bad ki paidbah ka Jylla ha ka lynti iaid jong ngi ha Shillong Parliamentary seat”.
Ka kong Ampareen ka pyntip ba kala dep leit iuhkjat haduh 10 tylli ki Block bad rung haduh 67 tylli ki Shnong ban ialap ia ka elekshon.
“Nga la iaid kumba 1000 km ha kine ki 33-34 sngi ban ialap elekshon bad ka don ka jingsngew ba ki MP ki kham jngai na ka jingiakynduh paidbah, kumta nga kwah ban weng noh ia kaneka jingsngew bad pyni ia ki paidbah naduh kaba sdang ba nga dei kaba shang, ngan shong baroh shimiet ha ki shnong jong ki, ngan sngewthuh ia ki jingeh bad ki jingdonkam jong ki” ong ka kong Ampareen.
“Shisien ba ka party kala pynmih ia ka manifesto, khlem pep ngin sa kham shai halor kane ka kam, ngan ym lah ban treikam shabar jong ka high command ka party” kala bynrap.
