Hakhmat u DC bad SP dawa pynshitom da kaba tyngeh їa u runar
Nongstoiñ, Rymphang 7: Ki Nongshongshnong ka Tiehsaw, West Khasi Hills, kila iamih paidbah hynne ka sngi Balang, ban iaid rally kum ka dak ka jingpynrem ia ka jingshah pyniap ka Kong Wansaralin Wanniang hala u jong u Kurim barim Biangkupar Nongsieh ha ka taiew bala lah.
Ia kane ka rally la pyniaid da ka Dorbar shnong ha ryngkat ka Seng Samla jong ka Shnong.
Ki paitbah naduh ki longkpa ki longkmie, ki samla bad haduh ki khynnah kiba rit ki la їamih ryntih bad la sakhi ruh ia ka jing wan iashimbynta da ki spah ngut ki paitbah na ki shnong ba mar jan kum na Mawrusyiar, Upper New Nongstoiñ, New Nongstoiñ, Ladweitang, Mawїonglumsyntiew, ki nongїalam bad ki dkhot jong ki sengbhalang kum ka KSU, HYC bad kiwei kiwei.
Shuwa ban dang ka jingїaid rally la pynlong ia ka jingїalang ba lyngkot ba la pynїaid da u bah M.Dkhar Sordar jong ka shnong Tiehsaw bad kala don ruh ka jingsngap jar kaba shi minit kum ka jingkynmaw bad sngew lem їa ka jingkhlad noh katei ka longkmie.
Ia kane ka rally la pynsdang na madan Tiehsaw bad ki nongiashimbynta kila iaid ryngkat ki placard ha kylleng ki jaka ka sor Nongstoiñ, Ladweitang haduh ban da poi ha khyrdop jong ka Ophis u Deputy Commissioner ka West Khasi Hills.
Ki Nongialam ka Shnong Tiehsaw ryngkat ki bahaiing hasem kane ka lanot, kila leit iakynduh ia u Deputy Commissioner bad Superintendent of Police ka West Khasi Hills, ban kyrpad ba kin shimkhia lang ha kaban pynthikna ba u briew ba leh ia kane ka kam bymman, u dei ban ioh ia ka jingpynsajia kaba tyngeh.
