Chokpot, Naiwieng 09 : Hadien palat hynriew phew snem bala buh mawnongrim da u Lat barim ka Assam, ha ka 5 tarik Jylliew, 1965, ka Chokpot Community and Rural Development (C&RD) Block kala ioh ia ka Ophis complex ba thymmai, kaba la plie paidbah da u Myntri Rangbah Conrad K Sangma ha ka sngi Nyngkong.
Ka Integrated Block Office Complex bala trei ha ka jinglut ba T.2.77 klur, ka pyni ia ka jingkyntiew kyrdan kaba heh bha ia kawei na ki C&RD Block kaba rim tam bad ba heh tam ha South Garo Hills.
Haba iathuh ia ka khana shaphang ka Block, u Conrad ula ong ba ka jinglong jingman jong kane ka Ophis ka dei ka jingsngewkhia kaba hakhmat eh jong u naduh ki sngi ba u dang long tang kum u MLA ha u 2008. U iathuh b aula sakhi ia ki nongtrei kiba trei ha ki kamra kiba khapngiah bad ba jot, kaba pyni ia ka jingdonkam ban pynbha ia ki jingtei ha ki jaka ba sha kyndong.
Hadien ka jingthaw ia ka Sorkar jong u ha u 2018, ka jingpynbha ia ki jingtei ha baroh ki C&RD Block kila dei ki kam kiba hakhmat eh. Naduh utei u snem, 56 tylli ki Block Ophis ba thymmai la dep ban mang ha kylleng ka Jylla ban pynkhlain ia ka synshar khadar, pynkhlain ia ka jingiatreilang hapdeng ki Tnad bad pynthikna ia ka jingshakri kaba bha sha u paidbah.
Ka Chokpot C&RD Block kala sakhi ruh ia ka jingkiew bun shah ha ka jingdon ki nongshongshnong. Na ka 40,478 ngut kat kum ka khana samari 2011, ka jingdon ki briew mynta kala kot sha ka 55,000 tam, kaba kiew haduh 36%, bad pyni ia ka jingdonkam ban pynbha ia ki jingtei kiba khmih ia ka synshar khadar.
Kane ka jingplie ka dei shibynta jong ka jingplie ia ki kam pynroi bapher bapher ha Chokpot ha ka sngi Nyngkong. U Myntri Rangbah ula buh ia ka mawnongrim ban tei ia ka surok Chokpot-Kharukol ba T.136 klur bad plie ia ka Chokpot Farmers Market, ka Chokpat Warima PRIME Hub bad artylli ki jingkieng.
