Shillong, Rymphang 07: Haba jubab ia ka jingpyrshah ban ai jaka iaki nongdie madan ha Veronica Lane Laitumkhrah, ka Myntri Sorkar Kong Ampareen Lyngdoh kaba dei ruh ka MLA ka thain, kala ong ba kan iai bteng beit ban khmih ia ki lad ki lynti ban weng ia ki jingeh jong ki nongleit nongwan khamtam hapoh ka thain Laitumkhrah.
Ka Kong Ampareen kala ong ba ka long kaba donkam ban don ka ‘No Vendor Zone’ namar ka jingdon ki nongdie madan ha man ki surok bad ki lynti synkien ka buh jingeh iaki ba iaid ba ieng khamtam haka por long skul. Kala ong ba kane kam dei tang ka jingsngew jong ka shimet hynrei kane ka jingdonkam ka dei kaba la kren ruh daka Act.
“Ngi hap ban pyntreikam daka ‘No Vendor Zone’ bad kane kam dei kaba nga ong shimet. Ka don ka Act kaba la kren shai. Ym donkam iano iano ban kren pyrshah ia nga ha surok. Kamp her ki kren aiu hynrei ngan pyrshang ban pyntreikam iaka Act” la ong ka Kong Ampareen.
Kum ka MLA jong ka East Shillong Constituency ba kynthup ka Laitumkhrah, ka Kong Ampareen kala ong ba ka long kaba donkam ban shimkhia ia kane bad kala ong “Lada nga lah ban leh ia kane kum ka MLA kaba shah kynthoh bun jait. Ngam tieng bad ngam kyran dien satia ban weng iaka jingeh ki nongleit nongwan namar ka jingshah knieh ki ki surok bad ki lynti synkien”.
Ka Myntri kala ong ba kam lah ban long ba baroh ki kynhun kin don ka jingiasngewthuh jingmut bad kala kyntu ia baroh ban iatreilang ban pynbeit halor kane.
