Imphal, Naitung 30: Kumba 12 ngut ki lehnoh ba ehrang jong ka kynhun Liberation Tigers of Tribals (LTT) ha kane ka sngi Balang ba la lah ki la wan pyndem noh ia lade hakhmat u Myntri Rangbah (CM) ka Manipur, u N Biren Singh bad pyndem noh ruh ia ki tiar ialeh jong ki kynthup ia ki kuli, ong ka khubor heh sorkar.
U nongaiktien ka tnat shipai u Lt Col AS Walia u la ong ba kine ki lehnoh ki la wan pyndem noh ruh ia kawei ka suloi M-16 rifle, artylli ki AK-56 rifles, kawei ka suloi double-barrel gun, kawei ka suloi .22 rifle, artylli ki pistol 9 mm, uwei u bom grenade ba la shna ha China, 14 tylli ki kuli AK, ka radio set bad kiwei kiwei.
Na ka liang u nongaiktien u la ong ba ka kynhun Spear Corps na ka tnat shipai ha ryngkat ki bor pulit ka Manipur ki la lah ban pynkohnguh ia kine ki 12 ngut ki dkhot ka kynhun LTT ba kin wan pyndem noh ia lade bad ban pyniasoh ha ka lynti ka ba dei.
Ia kane ka jingialang wanphai iing ka jong ki la pynlong ha Imphal ha ka ba kine ki 12 ngut ki dkhot ka LTT ki la wan pyndem wait hakhmat u CM ka jylla.
Na ka liang ki heh pulit ki la ai ka jingiaroh ia kine ki dkhot ka LTT ki ba la wan pyndem noh ia lade hakhamt ka sorkar bad kyntu ruh ia kiwei pat ki ba shah ialam bakla ha ka lynti ka bym dei ba kin wanphai sha ka lynti ka ba dei bad ban im hapdeng ka suk ka sain.
“Na ka liang ki ba haiing hasem jong kine ki lehnoh pyndem wait ruh ki la pynpaw ka jingsngew nguh ia ki bor pahara halor ka jinglah ka jong ki ban pynphai iing pat ia ki ba ieit ba thoin ki jong ki,” ong u Lt Col Walia said.
