Shillong, Naitung 31 : Ki don haduh saw jait ki smart meter hynrei ka RTI ba pan ka HYC pat kadei tang na ka bynta ka dor jong uwei u smart meter, pynshai u Symbud Myntri Rangbah ka jylla, Bah Prestone Tynsong halor ka jingkynnoh kaba iadei bad ka ishu smart meter ha ka jylla.
Haba kren bad ki lad pathai khubor, u Bah Prestone ba dei ruh u Myntri ka tnad Bording u la ong ruh ba ki don haduh 4 jait ki smart meter hynrei ka HYC ka kulmar jingmut ia ka dor jong uwei u smart meter da kaba klet noh pat ban khein wat ia ka GST, ka bai pyndait bad kiwei kiwei ki jinglut.
Katkum ka jingiathuh da u Symbud Myntri Rangbah kitei ki smart meter ki kynthup naduh u single phase smart meter, three phase smart meter, DT meter, LT meter bad u HT meter. “Hynrei na ka HYC kam shym la khein lang ia kiwei ki jinglut lada pyndait iaki smart meter hynrei kala shu pan jingtip beit katno uwei u meter u shong dor,” u la ong.
Shuh shuh u ong ruh ba ka jubab kaba u ai ha Iing Dorbar ka dei kaba biang namar uwei u smart meter u shongdor 3,750 tyngka, khlem pat kynthup pat ia ka GST, ka bai pyndait, ka dor jong ka Box bad kiwei kiwei de kiba lada khein lang baroh na bynta u single phase smart meter kan poi kumba 5,889 tyngka.
Haba iadei pat bad kiwei ki smart meter, u Symbud Myntri Rangbah u la ong ba ka jingpyndait ia ki ka iapher katkum ka jingheh ne katkum ka jingpyndonkam bording.
Tangba u ong pat ba ki paidbah ki dei ban tip ba ia ka bai pyndait ia ki smart meter kim donkam satia ban siew namar la pynlut hi da ka sorkar da ka jingiatrei lang bad ka Asian Development Bank.
