Shillong, Naitung 31 : Ka sorkar jylla lyngba u Symbud Myntri Rangbah ka jylla, Bah Prestone Tynsong ka kyntu ia ki nongshong shnong ka jylla ba kin peitngor bha namar ka jingnang kiew kiba ioh ia ka jingpang COVID, khnang ba ka sorkar jylla kan ym donkam ban pynjynsur biang sa shisien pat ia ki kyndon ba pyrkhing.
Katei ka jingkren jong u kadei hadien ba ka jingdon ki briew kiba ioh thymmai ia katei ka jingpang ka la tam spah haduh ba ki la don ruh ki jingjia ba sngewsih na katei ka jingpang.
“Nga tharai ka sorkar kam donkam shuh ban pynmih iaki kyndon thymmai kumno ban leh ban iada naka khlam COVID namar ki paidbah mynta kila sngewthuh ia kane ka jingpang. Hynrei nga kyntu ia baroh ban nym ia klet iaka jingbthah ka tnat ka koit ka khiah haba iadei bad ki lad lynti ban iada ialade na kane ka jingpang,” u la kyntu.
Shuh shuh u ong ruh ba na ka sorkar kim kwah shuh ban don ka jingpyrkhing biang ia ka leit ka wan ne ka kamai kajih jong ki paidbah namar ki la dep ban iohi haduh katno ki paidbah ki shem jingeh na ka jingkhang dam bad ki jingteh kyndon ha ki arsnem tam.
