Nagaland : Pyrshah jur ka ENPO ban weng ia ka jinglaitluid ka rung ka mih ha khappud Indo-Myanmar

Kohima, Rymphang 07: Ka Eastern Naga People’s Organisation (ENPO) kala pynbna ia ka rai ba ka Pyrshah jur ia ka jingweng noh ia ka Free Movement Regime (FMR) ne ka jingioh laitluid ban rung ban mih ha khappud ka India-Myanmar.

Ha ka kyrwoh, ka ENPO kala pynbna ba ki paidbah ka Eastern Nagaland kan ym shah ia kano kano ka sienjam ban ktah ia ka rukom im jong ki lane long ka diengpynkieng ia ka jingiadei ba ki don bad ki para ki hynmen na shiliang pud.

Ka ENPO ka kam ba baroh ki nongthaw policy ki sngewthuh shai ba ka jingphiah khappud hapdeng ka India bad Myanmar ka dei tang u lain ba shu iamutdur bad bala iarailang bad ruid lang da u Myntri Rangbah Duh barim Jawaharlal Nehu bad u U Nu ha u snem 1953 khlem ka jingmynjur jong ki Naga, kaba lam sha ka jingpyniaphiah ia ki paid Naga bad ka jaka puta ha khappud.

Ka ENPO ka ong ba ka khappud hapdeng ka India bad Myanmar khamtam ha ki bynta jong ka Eastern Nagaland, kala phiah napdeng ia ka Ri ki Naga, kaba lam sha ka jingpyn iajngai hapdeng ki bahaiing hasem bad ki paradoh parasnam.

Kala pynkynmaw ba ki paidbah ka Eastern Nagaland kila pyrshah jur ruh wat ia ka rai jong ka Sorkar ban ker sainar ia u khappud ha u snem 2011.

Ka ENPO ka ai jingmut ba ka India bad ka Myanmar ki dei ban jied ia ka lynti ban nang pynkhlain ia ka policy ba don mynta ha ka jaka ban pynduh pyndam noh ia ka FMR kaba la pyntreikam na ka bynta ka jingmyntoi jong ki briew ka thain.