Shillong, Rymphang 07 : Ka Liang Pyrshah Indian National Congress kala kyrpad ia ki artylli ki kynhun Liang Pyrshah-All India Trinamool Congress (AITC) bad ka Voice of the People Party (VPP) ban iatreilang ha ki sngi ba don ka Dorbar Mang tyngka jong ka Iingdorba Thaw Ain, ka ban sdang naduh ka 16 tarik haduh 27 tarik Rymphang.
“Ngi la dep thoh sha ki (AITC bad VPP) halor kane ka kam.Ngin dang ban ioh ia ka jubab na ki” ong u Nongialam ka Liang Pyrshah Ronnie V Lyngdoh, uba dei ruh u Nongialam ka CLP hynne ka sngi Ba-ar.
Haba kylli, u Bah Ronnie ula ong “Ngi la thoh sha ki naba kan don ka dorbar mang tyngka naduh ka 16 tarik Rymphang. Ngi la khot ia ki lada baroh lai tylli ki seng ka Liang Pyrshah kin iatreilang bad kren ia ki ishu ba iadei bad ka Jylla”.
Ka jingkhlain bor jong ka Liang Pyrshah ha Iingdorbar ka long 14 ngut ki MLA ba kynthup ia 5 ngut n aka Congress, 5 ngut na ka AITC bad 4 ngut na ka VPP.
Hynrei u LO ula ong ba ka Liang Pyrshah ha Iingdorbar kam dei satia kaba iapait iapra namar baroh lai tylli ki Seng ki don iala ka jong ka jingithuh.
Haba kylli la ka don ka lynti ba ki lai tylli ki seng kin thaw ia ka kynhun synrop, u Bah Ronnie ula ong ba kan bha palat lada baroh lai tylli ki party ki don da ka forum.
“Hynrei watla ngim don ia ka forum hynrei ngi wan ban iatreilang ha ka bor ba long Dorbar bad kren lang ia kijuh ki ishu, nga sngew ba kane kala biang palat” ula ong bad bynrap “Ngi kyrmen ba ngin sa ioh ia ka jubab kaba biang na ki”.
