Guwahati, Rymphang 04 : U Myntri Rangbah Duh ka Ri Narendra Modi ula pyllait paidbah ia ki project kam pynroi ba T. 11,600 klur ha Assam hynne ka sngi U Blei.
Hadien kane ka jingplie ia ki project, u PM Modi ula pynpaw ia ka jingsngewskhem ba kine ki kam pynroi kin nang pynkhlain ia ki lad pyniasoh ym tang ha ka thain Shatei Lam Mihngi hynrei wat sha ki khappud ki Ri ka South Asia.
Ula ong “Lyngba ka jingkyrkhu ka Maa Kamakhya, nga ioh biang ia ka lad ban plie ia ki project kam pynroi bapher bapher ha Assam. Dang mynta shiphang, ngi la pyllait ia ki project ba T. 11,600 klur. Kine ki project kin iarap ban pynjanai ia ki lad pyniasoh jong kane ka thain bad ki ri ka Southeast Asia.
Ha ka jingkren, u Modi ula ban jur halor ka jingnang kiew ka jingwan ki nongshang sawari hapoh ka thain Shatei Lam Mihngi, ban jur ia ka jingkongsan ban burom ia ka dei riti tynrai, bad iaroh ia ki jingtrei shitom ki samla ka Assam. U Myntri Rangbah ula ai jingithuh ruh ia ka jingnang kiew ka Assam ha ka jingdon ki jaka sumar kynthup ka jingnang don bun ki Medical College.
Hangne ki dei ki mat ba u PM Modi ula kren:
# Nang kiew ka jingwan shangkai ki nongshang sawari ha Northeast ha ki 10 snem bala leit.
# Ym don kawei ruh ka Ri ka ban kiew khlem da pyndam noh ia kaba la dep, hynrei ka jinglong jingman kala kylla ha kine ki 10 snem bala lah.
# Kito kiba don ha ka bor hadien ka jingioh laitluid kim shym la sngewthuh ia ka jingkongsan jong ki jaka mane blei, ki lehrain iala ka jong ka dei riti.
# Kito kiba don ha ka bor bun bun snem hadien ka jingioh laitluid kim shym sngewthuh ia ka jingkongsan ki jaka kyntang jong ngi. Tang ban myntoi Politics, kila pynlong pynban ia kaei kaei kaba pynlehrain iala ka jong ka dei riti bad ka pateng bala leit noh jong ngi.
# Palat 7000 ngut ki samla ka Assam kila iehnoh ia ka kam kiengatiar bad kila shim ia ka Sankalp ban trei na ka bynta ka jingkiew shaphrang jong ka Ri. Ha kiba bun ki thain, ngi la weng ia ka AFSPA. Ka Ri kam lah ban kiew tang da ka thong kaba rit.
# Shuwa jong ka Sorkar BJP ha Assam, ki don tang 6 tylli ki medical college hynrei mynta kila don haduh 12 tylli. Ka Assam mynta kala long kawei na ki jaka pdeng ban ai jingsumar ia ka jingpang bampong hapoh ka thain.
# “ki jaka leit pilgrim, ki temple, ki jaka mane blei-kine kim dei satia ki jaka ba kut tang ha ka jingleit iuhkjat. Kine ki dei ki dak jong ka jingiaid lynti jong ngi ha kine ki palat hajar snem bala leit noh. Kane ka dei ka sakhi ba kumno ka India ka ieng skhem ha man ki jingeh ba wan hap ha ka”.
U PM Modi ula wan ban pynlut por arsngi ha Guwahati bad ula wan poi ha Nongbah myn ha ka sngi Saitjain.
