Guwahati, Rymphang 04 : Ha ka jingpynbna kaba heh bha, u Myntri Rangbah Duh ka Ri Narendra Modi hynne ka sngi U Blei ula ong ba mynta ka bill bording elektrik kan sa kylla nod noh bad ka Sorkar Pdeng ka dang thaw ia ki lad ki lynti ban pynurlong ia kane.
Haba kren ha ka rally ha madan Khanapara Veterinary, u PM Modi ula ong “Mynta ka bill bording kan sa kylla nod noh bad ka Sorkar jong ngi, ka dang thaw ia ki lad ki lynti ban pynurlong ia ka. Mynta baroh kawei ka Ri ka ong, ba ka jingkuklar u Modi ka mut ba ka jingkular kan sa urlong shisha”.
Ula ong “Ha ka mang tyngka, ka Sorkar kala pynleit jingmut bha halor ka jingpyndait ia ki kor solar ha tnum iing. Ha ka kylla ba nyngkong, haduh shiklur ngut ki briew kin pyndait ia ki kor solar ha tnum iing bad kine ki briew kin kamai da ka jingpynmih bording bad ban pyndonkam ia ka”.
U Modi ula ong “Nga la ai ka jingkulmar ban pynbiang ia ki jingdonkam ba kongsan jong ki kynthei, ki samla, ki ba duk bad bun kine kila dep urlong shisha. Palat 30 klur ngut ki briew kila don bynta mynta ha ka Bikshit Bharat Yatra. Ka jingpynleit jingmut jong ngi ka long ban pynsuk ia ka jingim ki paidbah bad kane kala paw na ka interim budget ka Sorkar.
Shuwa u 2014, ha kine ki shiphew snem, haduh T. 12 lak klur la pynlut tang ha ki kam pynroi bapher bapher.
Bun bah ki longkmie kila wan iashimbynta ha ka rally u Modi bad bun na ki, kila pynpaw ia ka jingkmen bad ai jingiaroh ia u PM Modi halor ka jingai skhim ia ki kynthei.
“Ngi da kmen shisha ban iohi ia u PM Narendra Modi hakhmat jong ngi. U Modi ula ai shibun ki skhim ia ki kynthei bad mynta ngi la wan ban iohi ia u Modi. Ngi sngewtynnad ia ki jingkren jong u bad ngi ai khublei ia u ba u pyrkhat lem ia ngi ki Kynthei” ong kawei ka Longkmie kaba wan na Nalbari sha ka rally.
