Shillong, K’Lyngkot 30: U Myntri ka Tnat Pule u Rakkam A Sangma ula pynbna ba baroh ki skul hapoh ka Jylla kin hap pyndonkam beit daki kot bala ithuh da ka Meghalaya Board of School Education (MBoSE).
U Rakkam ula pyntip baka Sorkar ka dang bishar iaki jingioh nong ne duh nong bad iaki jingai jingmut bala phah daka Catholic Schools Association (CSA) kaba la kyrpad iaka Sorkar ban shah pyndonkam daki kot skul jong lajong.
“Na ka bynta kane, ym tang ia kito ki skul (CSA) hynrei ngi la shah ban pyndonkam tang mynta u snem daki kot lajong hynrei naduh 2025, ka Sorkar kan shah beit tang daki kot bala ithuh daka MBoSE ban pyndonakm haki skul” la ong u Rakkam.
U Rakkam ula ong ba ka Sorkar ka pdiang iaki jingai jingmut ka CSA namar ka Sorkar ka pdiang lada don kano kano ka jingdonkam ban iakren bad ula iathuh ba ka Sorkar kan thaw daka Committee ban bishar bniah iaki kot ki ban pyndonkam ha ki skul.
“Iaki kot yn bishar bniah shwa daki stad bad ngin sa shim iaka rai namar ka thong kadei hi ban pynthikna ba ki kot ban pyndonkam haki skul daki khynnah kin dei kiba biang tam” ula ong.
Haba pynpaw ba ki don bun ki skul shimet kiba kwah pyndonkam daki kot skul lajong, u Rakkam ula ong “Ka long kaba donkam eh iaka Jylla ban don tang kawei ki kot skul ba ryntih naka bynta ban pyndonkam haki skul namar kane ngin thaw da ki kot skul lajong”.
Lah ban kdew ba dang shen ka Sorkar Jylla kala pyllait iaki kot NCERT Textbooks naka bynta ka haka Teachers Initiation Conclave kaba la long ha Tura.
Nalor kane u Myntri ka Tnat Pule ula pyntip ba ka kot English bad Mathematics kin sa don noh ha ki iew naduh 5 tarik haduh 10 tarik Rymphang katba ki kot Science NCERT Meghalaya Edition kin don noh naduh taiew ban wan.
“Ka kynhun Myntri kala dep ban rai halor ki kot MBoSE ban pyndonkam haki skul hynrei namar ki jingduna, ki don ki skul kiba la dep ban mang daki kot lajong naduh 2023 bad dei namar kane ka Sorkar kan shah ban pyndonkam tang mynta u snem hynrei naduh 2025 baroh ki hap pyndonkam daki kot bala mynjur ka Sorkar” ula ong.
Nalor kane u Myntri ka tnat Pule ula iathuh bah aka taiew ban wan ka Tnat Pule kan lum ka jingialang bad stad na Khasi bad Garo Hills naka bynta ban thaw iaka State Curriculum Framework.
Ula iathuh ba ka jingialang kan long ban iakren halor ka riti dustur, ka tynrai, ka Sixth Schedule, ka put ka tem tynrai, ki jingialehkai ba ka ktien hapoh ka State Curriculum.
