Guwahati, Kyllalyngkot 27: Ka Gauhati High Court kala pan ia ka jingpynshai na ka Sorkar Assam halor ka rai ban pynlong ia ka sorbe ia ka ioh ka kot bad ka rukom im jong ki paod Muslim kiba dei ki trai nongshongshnong ka Jylla.
Ka Kynhun Myntri ka Assam kala mynjur ban pynlong ia ka sorbe ia ka ioh ka kot bad ka rukom im ki paid Muslim ka Assam ha ka 8 tarik Nohprah, 2023, hadien ka jingithuh ia san tylli ki jaidbynriew kata ki Syed, Goriya, Moriya, Desi, bad Julha kum ki Muslim trai Jylla.
Ia kane ka jingai jingithuh la pynshong nongrim kat kum ka kaiphod jong ka Cabinet Sub Committee kaba iadei halor ka kolshor jong kine ki san tylli ki Jaidbynriew bala pynlong ha u snem 2021.
Ki jingai jingmut jong ka Sub Committee ki kynthup ia ka jingthaw ia ka Legislative Council, ka jingbuh bha ia katto katne ki seat ia ki Assam Muslim bad kajingthaw ia ka Directorate ba kyrpang lane ka bor ka ban khmih tang ia ki.
Kane ka sorbe la khmih lynti ba kan iarap ia ka Sorkar ha kaban shim ia ki sienjam kiba donkam na ka bynta ban kyntiew ia kine ki paid Muslim ha ka imlang sahlang, ka synshar khadar, ka pule dangle bad kiwei kiwei.
Kine ki paid Muslim balaioh jingithuh kum ki Muslim trai shnong ka Assam ki dei kiba shong ba sah ha Brahmaputra Valley.
