Shillong, K’lyngkot 18 : Ka Nongaiktien ka Sorkar MDA bad Myntri Sorkar Kong Ampareen Lyngdoh ha ka sngi Palei, kala bthah ia ka Liang Pyrshah Voice of the People Party (VPP) ba kan iakynduh ia u Myntri Rangbah ka Jylla Conrad K Sangma ba kan kham ioh jingshai halor ka kam ba iadei bad ka Lokayukta ha ka jaka ban shim ia ki lynti iakhih.
Haba iakren bad ki nongthoh khubor, ka kong Ampareen kala ong “Ka jingkyrpad rit jong nga ia ka VPP, sngewbha sngewthuh ia ki jingbatai ba ngi la ai shaki paidbah ha kine ki khyndiat sngi bala leit halor ka jingwengkam ia ki dkhot ka Lokayukta. Ngi kyntu ia ka VPP ba kin pan jingshai shuh shuh na u Myntri Rangbah bad ka Tnad ba dei khmih lada ki dang donkam jingpynshai”.
“Ban shu shim ia ki lynti jingiakhih namar ki jingsngew pyrshah kam dei satia kaba iahap ban ong ia ka Sorkar lane pynshai sha ka Sorkar ia ki jingsngeew jong phi halor kino kinoki kam bad nga kyrmen ba ngin ym iohi ia ka jingiatakhuh namar haba kut ka sngi, ka Sorkar bad ka Liang Pyrshah ki hap leh iakano kano ka kam da ka jingkitkhlieh” kala bynrap.
Kane ka jingkynthoh kala mih hadien ba ka VPP kala rai ban pynlong ia ka jingiashong kyllain mungor hakhmat ka Secretariat lashai ka sngi Thohdieng ha ka por longtrei, ban pynbor ia ka Sorkar Jylla ba kan thungkam biang ia ki Ophisar jong ka Lokayukta bala shah wengkam.
Ka Kong Ampareen kala ong ba kam dei satia ka jingleh da ka jingmut ha lyndet lane don ka jingpynkhein iaki kyndon ka ain halor ka jingweng kami a ki Ophisar ka Lokayukta.
“Ngi hap iaid kat kum ka Lokayukta Acr, kaba la kdew shai ba ki dkhot jong ka Lokayukta ki dei ban long ki Ophisar ki ba dang don ha ka kam bad ha ka kyrdan Under Secretary lane Secretary ha ka Sorkar” kala ong.
Ka Kong Ampareen kala ban jur ba ka Sorkar Jylla kam dei satia kaba thung ia ki dkhot jong ka Lokayukta bad kam don bor ruh ban wengkam ia ki.
“Ka Sorkar ka shu phah ia ki kyrteng sha u Lokayukta ba un khmih bad shim rai haba thung ia ki dkhot” kala ong.
