Tura, K’lyngkot 12 : Kan long ka sngi sah kynmaw ha ka histori ka Ri-lum Garo ba ka thain kala ioh mynta ia ka Raj Bhavan ka ba-ar ha Jylla , kaba la plie paidbah hynne ka sngi Thohdieng da u Lat ka Jylla Phagu Chauhan lyngba ka kor online.
Ka Meghalaya ka don ia ka Raj Bhavan ba la tei naduh ka por jong ka Sorkar Bilat ha sor Shillong bad da kane ka Raj Bhavan ba thymmai, ka Meghalaya kala don ha ka thup ha ryngkat ki katto katne ki Jylla ka Ri, kiba don palat ia kawei ka Raj Bhavan.
Ki kynrem ki lyndan kiba la iadonlang ban sakhi ia kane ka sngi ki kynthup ia u Myntri Rangbah ka Jylla Conrad K Sangma, Lamphang ka Iingdorbar Thomas A Sangma, MP ka Tura Agatha Sangma, Myntri ka Tnad PHE Marcuise N Marak, ka Kmie u CM nalor ki heh ki hain bad ki Ophisar ka District.
Katba u Lat ka Jylla Phagu Chauhan ula ong ba ka jingpyndep ia ka Raj Bhavan ha Tura ka dei ka sakhi ia ka jingkut jingmut jong ka Sorkar ban pyniaid sted ia ki kam pynroi, u Myntri Rangbah Conrad K Sangma ula bynrap ba kane ka pyni ia ka jingialong kawei hapdeng ki paidbah ka Jylla.
U Lat ula niew ruh ia ka Ri-lum Garo kum ka jaka jong ki riewshlur bad kren ruh halor u Pa Togan Sangma. Ula iaroh ruh ia u Myntri Rangbah Duh ka Ri Narendra Modi halor ka jingshimkhia ban tynruh bad wanrah ia ki kam pynroi hapoh ka thain.
Kane ka Raj Bhavan ba thymmai ka don ha ka shnong Danakgre jong ka sor Tura bad la tei ia ka ha ka jinglut ba T. 24.1 klur, ha ka jaka ba heh 28.45 acre.
“Nga kmen shibun ba mynta ngi la plie ia kane bad kaba pynsngewhun eh ka dei ba tang ha kine ki khyndiat sngi ban wan, ka President ka Ri jong ngi, Droupadi Murmu, kan wan bad sah ha kane ka Iingsah u Lat. Bad ha ka sien ba nyngkong eh ha ka Jylla jong ngi ba ka President ka Ri India kan wan iuhkjat ha Tura. Kane ka shitaiew ban wan kan dei ka jingkyrkhu kaba khraw bha ia ka Jylla jong ngi bad khamtam eh ka Tura bad ka Ri-lum Garo” ong u Conrad haba ai jingkren.
U Conrad ula niew ruh ia ka 12 tarik Kyllalyngkot kum ka sngi sah jingkynmaw ha ka kam ialehkai namar ka jingplie paidbah ia ka Athletic Stadium ba thymmai bala ainam ha ka kyrteng u nongiakhun laitluid ka Ri-lum Garo Pa Togan Nengminja.
Ka Raj Bhavan ha Tura kaba thmu ban tei da ki dieng (Assam Type), ka dei kaba la sdang pyntrei naduh u snem 2009 ha ka jingmang pisa ba T. 5.48 klur bad la buh thong ban pyndep hapoh ka 3 snem. Ia ka main building la pynkylla hadien sha ka RCC ba lah ban kyrda ia u jumai bad la bynrap ruh ia ka banquet hall. Hynrei ha u 2016, kala mih ka jingpynkylla kaba lam sha ka jingslem ban pyndep.
Ia kane ka project la pynkhie im biang da u Myntri Rangbah ka Jylla Conrad K Sangma ha u snem 2021 bad ka Sorkar kala pynmih ia artylli ki work order bn pyndep ha ka jingtei kaba kynthup ia kawei kaba T. 10.98 klur bad kawei pat T. 7.69 klur.
Ia mynta, nalor ka Meghalaya, 7 tylli ki Jylla/Union Territories ki don palat ia kawei ka Raj Bhavan bad kine ki dei ka Jammu and Kashmir, Madhya Pradesh, Maharashtra, Odisha, Tamil Nadu, Uttarakhand, bad West Bengal.
Nalor kane ka jingplie paidbah ia ka Raj Bhavan ha Tura, u Myntri Rangbah ula ban jur ruh ia ka jingpynleit jingmut jong ka Sorkar ban pynkhlain ia ki jingtei jong ki Ophis treikam ka Sorkar ha baroh ki thain jong ka Jylla.
Ha Shillong, ia ka jingthmu ban rah noh ia ka Secretariat bad kiwei ki Ophis ka Sorkar sha New Shillong ha Mawdiangdiang, la dep ban shim rai bad ka Sorkar kan sa shna noh ia ka Secretariat bad ki Iingsah jong ki Nongtrei nalor kiwei kiwei ki jingtei ha ka thain.
Ha Tura, ka don ka jingthmu ban tei ia ka Integrated Administrative Complex ban wanrah lang ia baroh ki Tnad Sorkar bad ka Ophis u DC. Ia ka Integrated Administrative Complex ha Jowai la dep ban pynsdang ha ka jingmang tyngka ba kot T. 19.83 klur. Ka jingpynbha ia ki Ophis ki DC bad ki Block ha baroh ki District bad Block ruh kala sdang iaid mynta.
Nalor kine, ka Sorkar ka don jingthmu ban tei ia palat 700 tylli ki CM Citizen Service Delivery Centre ha baroh kawei ka Jylla. Kine ki Centre kin shakri kum ka jaka ban ai ia baroh ki jingshakri sha ki Nongshongshnong.
