Shillong, Nohprah 13: U Myntri Rangbah ka jylla u Conrad K Sangma hynne ka sngi Balang ula ong, ba ka jingsangeh noh jong ki kontraktor kiba rim ban shna ia ka surok Shillong Dawki Road kadei namar ba kila mih bun palat ki jingeh ban pyniaid shakhmat ia katei ka projek.
U Myntri Rangbah ula ong, ba ki don bun ki daw kaba la pynlong ia ki kontraktor kiba mynshwa ban iehnoh ia katei ka projek shna surok bad kam dei ba don tang kawei ka daw.
“Ki don ki bynta ba la mad ia ka jingeh ban ioh jingbit na ka tnad Forest, ki don ki bynta kiba la shem jingeh ha kaban pynkynriah ia ki tar ki tar, ki don pat ki jingeh ha kaban ioh ia ka jaka bad kala don ruh ka jingeh bad ki katto katne ki shnong ha kaba kala don ka jingpyrshah jong ki katto katne ki kynhun bad ki don ki khep pat ba mad jingeh bad ka jaka. Kumta ki jingeh kidei kiba bun bha, hynrei ka jingeh kaba khraw kaba ka jylla Meghalaya ka mad kaba kham iapher na kiwei pat ki jylla, kadei namar ba ka jaka kadei kaba la longtrai da ka shnong bad ka long jingtynjuh kaba heh ban lah ban pynkut ia katei ka jingeh bad kine ki shnong bad ki riewshimet ki don da ki spah ngut bad ym dei tang iwei. Kumta ka rukom pynkhreh nadong shadong ka long kaba jynjar bad kaba kyllaiñ bha, hynrei ngi la trei shitom bad wat ki ophisar ruh kila trei shitom bha bad ngi la lah ban weng ia ki katto katne ki jingeh” ong u Conrad.
U Myntri Rangbah ula ong, ba ki kontraktor kila sangeh noh ban shna iaka surok Shillong Dawki bad dang shen ka Sorkar Pdeng bad ka NHIDCL kala khot Tender bad kala pynkhamti ia ka kam sha ki kontraktor kiba thymmai.
“Ha ki 10 ne 15 sngi kiba la dep, ngi la shong ia ka jingialang ha kaba la donlang kitei ki kontraktor kiba thymmai ban sngewthuh ia ka rukom pynkhreh ka jongki bad ban pynsngew ha ki, ba kane kadei ka aiom ban trei bad kumta kidei ban leh kat kaba lah ban pyntyllun sted ia ki kam ki jam ha kine ki 6 bnai kiban wan. Ngi la ioh iaka jubab kaba biang bha na ki bad kumta ngi khmih lynti ba ia ki tiar ki tar bad ki nongtrei yn lah ban pynbiang noh bad ban sdang noh shen ia ka kam shna ia kitei ki surok” ong u Myntri Rangbah ka jylla.
U Conrad ula pynpaw ia ka jingkyrmen ba ia kane ka projek shna surok na Shillong sha Dawki kan long kaba iaid beit iaid ryntih noh.
