Shillong, Naitung 25: Ka Assembly Committee on Women Empowerment hynne ka sngi nyngkong, kala bthah iaka sorkar jylla ba kan tei iaka Rehabilitation Centre ban ai jingsumar ia ki kynthei kiba dih drok ha ka jylla.
Ka Chairperson jong ka CWE ka Kong Ampareen Lyngdoh kala ong, ka jylla Meghalaya kam pat don satia iaka rehabilitation centre kaba kyrpang na ka bynta ki kynthei watla ia kane ka mat la rah bad iatai ruh hapoh ka iing dorbar thawain ka jylla..
“Ngin ialeh ban pynthikna mynta ba ngin shong jingialang man la ka por halor kane ka mat ban pynkynmaw iaka sorkar ia ka jingdonkam kyrkieh ban don noh iaka rehabilitation centre na ka bynta ki kynthei,” ong ka MLA jong ka East Shillong haba iakren bad ki nongthoh khubor.
Ka la ong ba ki kynthei bad ki longkmie ki shem jingeh ban ioh jaka sah ha ki Rehabilitation centre khamtam haba ka jinglong jingman kala sdang shyrkhei bha bad ka long kaba donkam ban shimkhia ban pynthikna ba kane ka jingangnud jong ka committee kan urlong noh.
Katba u Bah Himalaya Shangpliang u la ong, ba ka committee kala bthah iaka tnad Social Welfare ryngkat ka jingiatreilang bad ka State Commission for Protection of Child’s Rights (SCPCR) ban shim ia ki lad ki lynti ha kaba iadei bad ka jingdih drok ki khynnah naduh ka 12 snem ka rta haduh 18 snem haka jylla.
“Watla ngi tip ba ki pulit kila leh iala ka kamram ban bat bad kem ia ki nongdie drok bad ia ki nongkhaii drok. Nga tharai ba ngi donkam ban shimkhia ia kane bad ka imlang sahlang ha kaba ki paidbah ki dei ban ioh ia ki jingtip bad jingpynsngewthuh kumno ban leh ne sumar ia kiba ngop ha ki kam dih drok” ong u Bah Shangpliang.
