spot_img

Sdang kylla ka Meghalaya kum ka “Hotspot” ki nongkhaii droks bad jingdih pynbuaid

Date:

Share post:

Jur eh ka jingkhaii ia u Heroin, u Ganja bad u dawai Yaba

Shillong, Naitung 25: Ka Jylla Meghalaya kaba ju iatip kum ka dewlynnong ka jingsuk, kala sdang ban kylla long mynta kum ka jaka ba thnem ka Iew die droks ne ka ‘Hotspot’ ki nongkhaii drok bad jingdih pynbuaid namar ka jingnang kha roi jong ki nongdih ia kine ki jingdih buaid bad buh ia ka Tnad Pulit hapdeng ka jingeh ban tehlakam.

Kat kum ki jinglum jingkhein jong ka Tnad Meghalaya Police lyngba ka Tnad CID, ka pyni ba u droks heroin, u ganja bad u dawai kuli Yaba ki dei kiba iaid iew bad bala pyndonkam bun eh da ki Samla ka Jylla. Kumjuh ruh u opium bad ki dawai jyrhoh kila sdang ban ioh ia ki briew ba thied ne ki nongthied ha kane ka Jylla.

“Ka jingjyllei jong u droks kala kylla long kawei na ki jingeh mynta ia ngi bad ngi la pyrshang katba lah ban iakhun pyrshah ia kine ki jingdih ba sniew” ong u Dr LR Bishnoi Director General of Police (DGP) ka Jylla.

Une u Heh Pulit ula ong “Ngi la pyntreikam mynta ia ki buit thymmai bad pynkylla ruh ia ka rukom treikam ban iakhun. Ngi la pynleit jingmut ruh mynta ban pynkhlain ia ka jingiadei bad ki paidbah kiba shah ktah jur eh na kane ka kam. Satang lada ngi iatreilang, ngin sa lah ban jop ia ka thma bad rat naduh dyngkhong ia kine ki jingdih ba sniew”.

Namar ka jingiajan jong ka Golden Triangle-(ka jaka bala ai nam da ka CIA ia ka khappud jong ka Thailand, Laos bad Myanmar kaba iakynduh lang ha Wah Ruak bad Mekong) bad ka Ri India, ka Meghalaya kala kylla long ka lynti pyniaid ia kine ki jingdih pynbuaid bad ka lynti iaid jong ki nongkhaii droks.

Kat kum ka jingshem ka Tnad Pulit, ka lynti na Tahan, Falam, Jiribam, Silchar, Khliehriat, Jowai bad Shillong ka dei ka lynti ba pyniaid ia u droks heroin bad u dawai kuli Yaba katba ka Agartala, Aizawl, Kohima, Silchar, Khliehriat, Jowai, Shillong bad Guwahati ka dei kaba pyndonkam ban khaii bun eh ia u ganja.

Kat kum ki jingkhein (data) bala ioh, ka jingdih heroin ha Jylla Meghalaya kala kiew bha ha kine ki san snem bala leit noh. La iathuh ba ha u snem 2017, ka jingioh kurup heroin da ki bor ka ain ka long tang 606.82 gram hynrei mynta u snem 2022 tad haduh u bnai Naitung, ka jingioh kurup heroin kala kot sha ka 1791.951 gram. Ha kine ki san snem bala leit noh, ka jingioh kurup baroh kala kot haduh 15,950.582 gram.

U Snem 2020 ula sakhi ia ka jinghiar ha ka jingwan poi u heroin ha Jylla namar ka jinglynshop jong ka khlam Covid-19 hynrei watla katta, ka jingioh kurup ia u heroin ha une u snem kala kot ia ka 2640.17 gram.

Uwei pat u jingdih pynbuaid ba iaid iew bha hangne u dei u dawai kuli Yaba ha kaba la sakhi na ka 193 tylli bala ioh kurup ha u snem 2017, kala kiew sha ka 21,597 tylli mynta u snem haduh u bnai Naitung bad ka jingioh kurup ha kine ki san snem naduh u snem 2017 kala kot sha ka 8,49,275.

Kaba pynkyndit pat ka long ba ka jingioh kurup ia une u dawai pynbuaid kaba bun eh ka dei ha u snem 2020 ba dang jur ka jinglynshop ka khlam Covid-19, kaba kot sha ka 3,47,439 tylli.

Ki Pulit kila ioh ruh ban kurup haduh 5978 bitor ki dawai jyrhoh ha kine ki san snem bad kaba bun eh ka jingioh kurup ka dei ha u snem 2019, kaba kot haduh 2943 bitor.

Ka jingioh kurup ia u Opium kala nang hiar bad ha kine ki san snem, ka jingioh kurup ka long tang 2,796.14 grm bad kaba bun eh ka dei mynshemsnem kaba kot haduh 2010.14 gram.

U Ganja u dang iai bteng ban long u jingdih ba bun eh ki nongdih ha kane ka Jylla bad ka thain ia kaba la sakhi na ka jing ioh kurup haduh 7,709.52212 gram ha kine ki san snem bala leit noh. Watla ha u snem 2017 ka jingioh kurup ka kot tang 101.900 gram hynrei mynta u snem kala kot haduh 2188.305 gram.

Ka Tnad Pulit kala pynkhlain ialade ban iakhun ia ka jingma na ka jingjyllei u droks ha ki surok ka Nongbah Shillong bad kiwei ki jaka sor jong ka Jylla bad kala thaw ruh ia ka Anti-Narcotics Task Force (ANTF) ha man ki 13 tylli ki District ka Jylla ki ban iakhun pyrshah ia u droks. Kine ki Kynhun kila ioh ia ki tiar kem droks ka juk mynta, ki ksew sma droks bad kiwei kiwei, ban pyndonkam ha ka thma pyrshah droks.

Ka Tnad Pulit kala ioh ruh ban kem haduh 763 ngut ki Nongkhaii droks ha kine ki san snem bala leit noh bad na kine, 446 tylli ki case la chargesheet. Ka jingiohkem kaba bun eh ka dei ha u snem 2019 ha kaba haduh 189 ngut ki briew kila shah kem bad 110 tylli ki case la register.

Share post:

spot_img
spot_img

Popular

More like this
Related

Kular ka DGP ban leh eiei halor ki nongpynkulmar shnong bad ki jingeh ki PWD

Shillong, Jymmang 30: Ka Director General of Police (DGP)...

Kurup ka Tnad Custom ia ka bniat hati ba khia 27 kilo

Shillong, Jymmang 30 : Ha ka jingkhynra pyrshah ia...

Kyndit ka KSU ba phah pyniasoh ka Sorkar ia ki College sha ka Williamson Sangma University

Shillong Jymmang 30: Ka Khasi Students Union kala pynpaw...

Plie ka DGP ia ka jingkhang ban sngap ia ki jingeh bad jingai jingmut ki paidbah

Shillong, Jymmang 30: Kum shi bynta ban tei iaka...
spot_img