Shillong, Nohprah 6 : Ki Nongialam ba hakhlieh duh ka seng Hynniewtrep National Liberation Council (HNLC) kin dang ban aiktien ia ka rai jong ki halor ka jingkyrpad ka Sorkar ba kin wan iashimbynta lang noh sha ka miej iakren iasuk.
Haba iakren bad ki nongthoh khubor hynne ka sngi Balang, u Symbud Myntri Rangbah ka Jylla Bah Prestone Tynsong ula ong “Haduh mynta, ngin dang ban ioh ia ka jingaiktien na ki Nongialam ka HNLC”.
U pyntip ba ka HNLC kala pyntop sha ka Sorkar ba kano kano ka jingaiktien na ka Seng kan iaid lyngba u nongmihkhmat jong ka seng Bah Sadon Blah, uba dei u President ka Hynniewtrep National Youth Front (HNYF).
Halor ka jingdawa ka HNLC ban map noh ia baroh ki kam bymman, u Bah Prestone ula ong “Baroh kine ki kam ki dei kiba lah ban iakren halor ka miej iakren. Ynda ki Nongialam ba hakhlieh ka HNLC lem bad ki ksiar naka Jylla bad ka Sorkar Pdeng kila iashong iakren bad iasyllok, kin sa wan sha ka Sorkar bad pyntip ia kaei ka jingai jingmut jong ki”.
Ula ong ba ka Sorkar ka kwah ba ka jingiakren iasuk kan long bad ki Nongialam ba hakhlieh duh jong ka HNLC.
“Ai ba ngan iai kyrpad ia ki Nongialam ba hakhlieh ka HNLC, ka jingkhang ka plie ban iakren. Ka kylla ba nyngkong jong ka jingiakren kala dep long. Ngi kwah ban shong sa ka kylla kaba ar, b alai, bad kaba saw tad haduh ba ngin da shimrai lang” ong u bah Prestone.
