Shillong, Nohprah 06: Ka Sorkar Jylla kala bthah ia ki bor pyniaid District bad ka Tnad Meghalaya Police, ba kin peitngor bad tehlakam ia ka jinglum pisa beain jong ki kynhun Sengbhalang bad ki riew shimet na ki nongkhaii bad ki dukan ha nongbah Shillong.
“Ngi la dep bthah ia ki bor District bad ka Tnad Pulit ba kin tehlakam ia ka jinglum pisa beain jong ki Sengbhalang bad ki riew shimet ha Shillong” ong u Symbud Myntri Rangbah ka Jylla Bah Prestone Tynsng haba iakren bad ki nongthoh khubor.
U Bah Prestone ula pyntip ia kane halor ka jingmih ki kynthun kiba leit khrong pisa bad lum synniang beain na ki nong khaii ha Nongbah.
Dang shen, ki Pulit kila kem ia katto katne ngut ki briew kiba leit lum pisa beain bad khong synniang na ki nongkhaii ha ki kyrteng jong ki kynhun Sengbhalang bapher bapher.
“Khlem da ioh jingbit na ka Sorkar Jylla, ki Sengbhalang kim lah ban shu leit lum pisa” ong u Symbud Myntri Rangbah.
“Peit kala shai kdar, ngi la dep bthah ia ki bor District bad ka Tnad Pulit ba kin leh eiei pyrshah ia ki kynhun kiba dawa pisa ha Shillong” ula bynrap.
U Bah Prestone ula ong ba tad ynda ioh jingbit na ka Deputy Commissioner, ym don ba lah satia ban shu leit ialum synniang na ki dukan.
