Guwahati, Nohprah 06: U Myntri Rangbah ka Assam Himanta Biswa Sarma ha ka sngi Balang, ula ong ba ki jaidbynriew Rohingya kila pyndonkam ia ka Assam kum ka lynti iaid ban leit sha Delhi, Jammu & Kashmir bad sha Kerela.
Haba iakren bad ki nongthoh khubor ha Guwahati, u Myntri Rangbah ka Assam ula ong “Ki Pulit ka Assam kila ioh bat haduh 137 ngut ki Rohingya bad 304 ngut ki nong Bangladesh kiba rung beain ha Assam bad Tripura. Kila rung lyngba ka Tripura bad pyndonkam ia ka Assam kum ka lynti iaid hynrei kila sah pat ha Delhi, Kerela, Hyderabad, Chennal bad Jammu & Kashmir”.
“Ngi la leh iala ka kamram na ka bynta ka Ri da kaba bat ia ki Rohingya. Ka MHA kala shimkhia ia kane ka kam bad ka NIA kala shimti ia ka jingtohkit” ong u Himanta.
Ula bynrap “Ka National Crime Record Bureay ha ka kaiphod ba khatduh eh kala kdew ba na ki kam bymman ha baroh ki Jylla, ka Assam kala sakhi ai ka jinghiar ba kot haduh 50% naduh u snem 2021”.
“Ngi la iohi ia ka jinghiar ki kam bymman pyrshah ia ki kynthei bad khynnah, kaba pyni ia ka jingkut jingmut jong ka Sorkar Jylla ban tehlakam ia ki kam bymman lyngba ki jingpynkylla bapher bapher ha ka rukom treikam ki Pulit” ong u Himanta.
