Shillong, Naitung 24: Ka Congress hynne ka sngi U Blei kala dawa ban thung mardor da ka jingtohkit ba laitluid halor ka kam khaii met bala lap da ki Pulit naka Farmhouse jong u Nongialam ka BJP ha Ri-lum Garo.
“Ka dei ban don mardor da ka jingtohkit ba laitluid ban sei madan ia ka jingshisha halor kane ka kam pohjait kaba la jia hapoh ka Jylla kata ruh ha ka jaka ba marjan bad ka jaka sah u Myntri Rangbah ka Jylla” ong u Vice President ka Congress Bah Ronnie V Lyngdoh ha ka kyrwoh.
Kat kum ka jingong jong u, ia ki briew ba shah kem ruh dei ban phah noh sha ka Judicial custody ne set da ka Iingkashari khnang ban yn lah ban ioh ia shibun ki jingtip ba kongsan na ki khlem da pynjulor ia ki sakhi satar.
Une u MLA barim bad MDC ba mynta ka Mylliem ula ong “Ngim dei ban klet baka kam pynjot ia ka longrynieng jong ki Khynnah kala mih na kane ka jaka- ka Rimpu Bagan naduh u bnai Rymphang hadien ka jingujor jong ki bahaiing hasem jong kane ka Khynnah”.
“Na kane ka jingjia, lah ban ong ba ki Pulit kila ioh ia ka jingtip halor ka jingdon jong kane ka jaka bad ki kam bymman ba la leh ha kane ka jaka” ula ong.
U Bah Ronnie ula ong ba ki Pulit mynta ka sngi kila pynthikna ba kawei ka Khynnah kala shah leh beijot la bun sien tang hapoh ka shitaiew bad ia ka case la register hapoh ka kyndon 366A/376 jong ka IPC bad ki kyndon jong ka POCSO Act.
“Khlem da pynsyrwa kai ia ka por, u Myntri kam pohing u dei ban jubab ba balei ka shimpor slem bha ban khynra ia kane ka jaka. Hato ka don ka jingpynbor naka BJP lane don ka jingiasngewthuh jingmut hapdeng u Bernard Marak bad ki Nongialam ka NPP na Ri-lum Garo” ong u Bah Ronnie.
Une u Nongialam ka Congress ula bynrap “Nalor kata, u Myntri Rangbah u dei ruh ban jubab ia kane ka jingjia namar kaei kaba jia kala jia hajan ka jaka jong u. Ka Resort jong u Bernard ba shah khynra kam da jngai na ka Iingsah u Myntri Rangbah bad kam sngew phyla ba lada don na kiba sha kem kiba dei ki briew ba iajan bad ka NPP”.
U Bah Ronnie u la kynnoh ruh ba ka jingkhynra jong ki Pulit ia ka farmhouse jong u Vice President ka BJP hynnin ka sngi saitjain ka lah ban dei ka buit jong ka NPP ban tap eitmiaw ia ki jingshah kynnoh bamsap ba lai phew jait ha kine ki san snem bala leit.
Ha kawei ka liang, une u Nongialam ka Congress ula ong ba donkam ruh ban bishar bha ia ka jingkynnoh jong une u Bernard pyrshah ia u Myntri Rangbah ka Jylla ba ong ba ka jingkhynra ka dei tang ka jingkput namar ka jingsheptieng ioh shah pynliem noh ha ka elekshon ban wan ha ka BJP.
“Hato u Myntri Rangbah u nud ban iathuh ia ki paidbah ka Jylla balei ba ka shimpor slem bha ia u bad ia ki Pulit ban sei madan ia ki kam une u Nongialam ka BJP?. Ka dei ka jingshisha ba un sngap jar lada ka BJP ka mih noh na South Tura Constituency bad nym pynthut shuh ia ka NPP” ula ong.
U Bah Ronnie ula kdew ba ki don haduh 25 tylli ki case kam bymman kiba heh pyrshah ia u Bernard haba khmih ruh ia ka jingiadon bynta jong u bad ka kynhun kiengatiar ANVC.
