Shillong, Naiwieng 28: Ka Khasi Students’ Union hynne ka Sngi Baar, kala ai jingiarap ia ki samla ki ban leit iashimbynta ha ka National Youth Champion League kaba la pynlong da ka Pro MMA League hapoh Priyadarshini Youth Complex, Malund West, Mumbai naduh ka 8-10 tarik u Nohprah 2023.
Ka KSU hapoh ka jingialam jong u Samla Eric Nongkynrih, Sport Secretary, kala ai jingiarap ia ki 4 ngut ki Samla kiban mih khmat sha ka National Youth Champoin League lyngba ka Shlem School of Martial Arts kaba don ha Mawlai Iewrynghep.
Haba ai jingkren, u samla Eric ula kyntu kynpham ia kitei ki samla ba kin trei shitom ban ioh kheit ia u soh ka jingjop ha ka jingiakhun ka jongki bad kumjuh ban iai kyntiew lem iaki para samla namar ka jingialehkai Sports kadei kawei ka lad ka lynti ka ban pynlait ia ki samla na ki jingdih pynbuaid kum u drok uba lah kynrei bha hapoh ka jylla.
Ula pynkynmaw ruh ia ki sienjam kiba ka KSU kala shim ha kaba ka lah plie iaka Maitshaphrang MMA & Fitness Team hapoh ka shnong Nongthymmai kum kawei na ki shlem ban ai jinghikai ia ki Samla ha ka liang kilan met bad kumjuh ban ban kyntiew iaki Samla ha ka kam ialehkai.
