Shillong, Naiwieng 13 : Ki Pulit ka East Khasi Hills, kila maham ban kem naphang ia kino kino ki briew kiba iashong dih kyaid ne dih droks ne khaii droks hapoh bad shabar ka khlaw Lawmali bad ban pynngat ia ki hapoh ki kyndon ka ain Meghalaya Police Act bad NDPS Act.
Kane ka rai kala mih na ka jingialang jong ka Tnad Pulit bad ki Rangbah Shnong bad Nongkitkam Shnong ka Riatsamthiah, Wahingdoh, Jaiaw Shyiap, Jaiaw Mihngi bad Mawlai Phudmuri nalor ki OC/I/c jong ki thanad bad beat house ka Nongbah Shillong, kaba long hynne ka sngi Nyngkong ha Police Reserve Conference Hall.
Kat kum ka kyrwoh na u Superintendent of Police (City) ka East Khasi Hills Bah Vivek Syiem, la ong ba ka jingialang kala shim ia ka rai ban nym shah shuh iano iano ruh ban iashongkai ha kane ka khlaw bad lada shem ia kino kino kiba khaii droks, iadih droks ne dih kyaid kin shah kem bad shah pynngat ha ki kyndon ain.
Khnang ban khanglad ia ka jingrung ki riew bymman sha kane ka khlaw ha ka por mynmiet, kaba dang dei ka khlaw ka Tnad Forest, la rai ban sa rah iakren bad ka Tnad Forest ba kan ker bad shna noh da ka khyrdop ha kane ka khlaw.
U Bah Vivek u pyntip ba ia kito kiba ioh bat ba iashong dihkyaid, dih droks ne khaii droks hapoh ki kali harud ka surok jong kane ka khlaw, kin shah pynngat hapoh ka kyndon 110 jong ka Meghalaya Police Act bad ka NDPS Act kat kum ka kam ba ki leh.
Ha kajuh ka por, ka Tnad Pulit kala ai khublei ia ki Dorbar Shnong kiba la shim ia ka sienjam ban iatehlakam lang ia kane ka jingeh.
U pyntip ba ha kane ka jingialang, la iakren ruh halor ka jingjyllei bad jingkhaii ia u droks hapoh ka Nongbah ha kaba ki nongiashimbynta kila ai ia shibun ki jingai jingmut.
