Shillong, Naiwieng 13: Kawei ka Longkmie kala duhnoh iala ka jong ka jingim na ka jingniah thuk thuk khlem akor jong uwei u briew ha ka thain Umjan, Mawlai Mawdatbaki.
Kane ka jingjia kala jia hynne ka janmiet sngi Nyngkong ha ka por 6 baje eiei, ong ka khubor Pulit kiba iathuh ba kane ka jingjia kala jia ha ka por ba kane ka Longkmie ka dang jam sha shiliang ka surok ha ka shnong Umjan.
La pyntip ba ine I Longkmie I dei iba shong ba sah ha Mawlai Kynton Massar.
Ki Pulit ki iathuh ba ka jingjia hi kala jia na ka jingniah pynher sted jong u nongniah ka thuk thuk kaba don u nombor ML05-AA-6505, uba la leit tynrah beit beit ia kane ka longkmie haduh ba kan da thiah lyngktar hapdeng ka jingphlei snam na ki bynta jong ka khlieh.
Ia kane ka Longkmie la pynkit noh mar mar da ki Pulit kiba la wanpoi ha katei ka jaka lem bad ki riew paidbah, sha Civil Hospital ba kan ioh ia ka jingsumar. Hynrei la pyntip ba ki doktor kane ka hospital Sorkar kila pynbna ba kane ka Longkmie kala khlad shuwa ban poi ha ka jaka sumar.
