Shillong, Naiwieng 13: Ka Sorkar Jylla lyngba ka tnat Arts and Culture hynne ka sngi kala pynban ban pynlong iaka tamasa ka Tri Hills Ensemble ka ban sdang naduh 15 tarik mynta u bnai.
Ia kane la pynbna da u Commissioner and Secretary ka tnat Arts and Culture ka sorkar Jylla u Bah FR Kharkongor bad ula iathuh ba ia kane ka Tamasa la pynlong kum shi bynta ban rakhe iaka Janjatiya Gaurav Divas ha baroh kawei ka Ri India.
Lah ban kdew ba ka sorkar pdeng haka 15 tarik Naiwieng 2021, kala rai ban rakhe iaka Janjatiya Gaurav Divas naka bynta ban kynmaw burom ia u Birsam Munda, u nongialeh laitluid ki riewlum.
Haba kren sha ki lad pathai khubor u Commissioner and Secretary ka tnat Arts and Culture ka sorkar Jylla u Bah FR Kharkongor ula iathuh ba kane ka tamasa Tri Hills Ensemble ka dei ka tamasa ban pyninam iaki jingriew spah ki jaidbynriew riewlum ka Ri India.
U Bah Kharkongor ula iathuh ruh ba ha kane ka tamasa ka sorkar kan ai jingithuh kyrpang ia ki 6 tylli ki shnong hapoh kane ka jylla kiba dang pynneh pynsah ia la ka lariti lyngba ki sap kyrpang ba ki don.
“Haka 15 tarik mynta u bnai ka Meghalaya kan iasnoh kti lang bad baroh ki Jylla hapoh ka Ri India ban rakhe iaka Janjatiya Gaurav Divas ban ban pyninam iaki jingriew spah bad ka jinglong kyrpang ki jaidbynriew riewlum” la ong u Bah Kharkongor.
U Bah Kharkongor ula pyntip ba ha kane ka tamasa ka ban neh haduh shitaiew, ka tnat ka tnat Arts and Culture kan pynkupburom ia 6 tylli ki shnong ba kynthup ka shnong jong ka Meghalaya kiba dang iai pynneh iaka riti dustur, la kadei haka pur ka tem, ka thain tynrai bad kiwei kiwei.
