Pdiang u MLA ka Mawkyrwat ia u Nongialam ka HYC sha ka UDP
Shillong, Naiwieng 12 : U President barim ka Hynniewtrep Youth Council (HYC) Bah Robertjune Kharjahrin, ula pyntip ba ula rai ban iakhun ia ka elekshon MP-Lok Sabha 2024 namar ka jingdon bun ki ishu ka Jaidbynriew kiba dang pynsahteng ha ka Sorkar India.
U Bah Robertjune ula pyniasoh ialade hynnin ka sngi Saitjain sha ka United Democratic Party (UDP) kaba ula pan ia ka ticket ban iakhun ia ka elekshon Lok Sabha na Shillong Parliamentary seat ka ban long ha u snem ban wan.
Ia u Bah Robertjune uba trei kum u nongiasaid ain, la pdiang da u Nongialam bad MLA ka UDP na Mawkyrwat Bah Renikton Lyngdoh Tongkhar ryngkat ka UDP-Mawkyrwat Circle ha ka jingialang kaba long ha Mawkyrwat, South West Khasi Hills.
Haba iakren lyngba ka phone, u Bah Robertjune ula pyntip ba ula rai ban iasoh sha ka UDP namar ba dei ka party kaba lah ban treikam bad kaba don ia ki nongialam kiba skhem.
“Nga dei u briew ba don ia ka jingmut jingpyrkhat riewlum bad ka nongrim jong nga ka long ban kyntiew, pynneh pynsah bad iada ia ka jinglong ba kyrpang jong ka jaidbynriew-ka iasyriem bad ka nongrim treikam ki seng rielwum” ula ong.
“Bad napdeng ki seng riewlum, ka UDP ka dei kaba pdiang bha ha Meghalaya. Kumta, nga kwah ban iadonlang bad ki kynhun kiba don ia ki nongialam kiba skhem bad ka tbit treikam. Nga burom ia baroh ki seng riewlum hynrei namar ba nga hap jied ia kawei, nga la jied ia ka UDP” ula bynrap.
Haba pyntip ia ka rai ban iakhun ia ka elekshon Lok Sabha, une u Nongialam Sengbhalang ba kylla riewsain pyrthei ula ther tyngeh ia u MP ba mynta jong ka Congress Bah Vincent H Pala halor ka jingbym lah ban kren ia ki ishu ba sahteng ka Jylla ba kynthup ia ka ILP, ka jingpynrung ia ka ktien Khasi ha ka khyrnit ba phra ka riti synshr ka Ri, ka kajia khappud nalor kiwei kiwei ki jingeh kiba iadei bad kaMMDR Act, ka jingpynkylla ia ka Sixth Schedule bad kiwei kiwei.
“Ngam pat ju iohi ia u MP jong ngi ba un kren halor kine ki ishu. Ta ka daw haba um shym la trei hok ia ka kam ba u dei ban trei, ka jingpynrem ia u tang namar kan ym don jingmut satia haba kut ka sngi. Ta ka daw nga kwah ban pynbteng ia ka thong jong nga ban iada, pynneh pynsah bad kyntiew ia ka jaidbynriew Hynniewtrep. Nga la rai ban ai ka jingshakri kaba bha tam ia ki paidbah lajong bad ka kam sain pyrthei ka dei kawei na ki lynti. Ta ka daw nga kwah ban tyrwa ialade kum u kyrtong” ula ong.
Halor ka jingkylli, u Bah Robertjune ula ong ba un ieh ha ka jingstad jong ki nongialam ka UDP ba kin rai halor ka ticket.
“Ia ka ticket jong ka party hi yn sa shim rai da ki Nongialam ka UDP bad ka RDA. Ka kam jong nga hi ka dei tang ban tyrwa ialade kum u kyrtong” ula ong.
