Shillong, Naiwieng 12: Ka Hynniewtrep Youths’ Council kala dawa naka sorkar jylla ba kadei ban thaw ia ki lad ki lynti ban pynurlong iaka jingdawa jong ki nongtrei ASHA kiba don ha kane ka jylla.
Katkum ka kyrwoh na u President ka HYC u Bah Roy Kupar Synrem ula ong ba ka seng kam lah ban shu sngap ne peit ia ka jingbym lah ka Sorkar ban pynbeit ia ki jingeh bad jingdawa ba don nongrim jong ki Nongtrei ASHA.
“Ka Seng ka dawa ba ka Sorkar kadei ban thaw ia ki lad ki lynti ban pynurlong ia ki jingdawa jong ki ASHA ban ioh ia ka jingsiew kaba biang katkum ka kam ba ki trei, ban kynthup ia ki hapoh ka MHIS na bynta ban ioh jingsumar ei bad kiwei kiwei ki jingdawa jong ki” ong u Bah Roy Kupar Synrem.
“Ngi pynpaw ia ka jingai jingkyrshan kaba pura ia ka MAWU halor ka jingiakhih ka jong ki bad ngim lah ruh khlem da ai khublei bad sngewnguh ia ki ASHA halor ka jingtrei len lade ka jongki ha ki jylli treikam kaba ki don khamtam eh ngim dei ban klet kumno ba ki len lade ha ka por ba ngi mad ia ka Khlam COVID-19, dei ma ki, kiba long kita ki nongtur bahakhmat ban iakhun pyrshah ia kane ka khlam. Ki lah ai ka jingshakri kaba pura ia ki Nongshong shnong ha kato ka por bad ha man la ka sngi ha kaba iadei bad ka koit ka khiah jong ki Nongshong shnong hi baroh” ong u President ka HYC.
Ula iawer ia baroh ki dkhot ka jaidbynriew, ki Dorbar Shnong bad kiwei kiwei ba kin kyrshan ia ki ASHA ha kane ka jingiakhih ka jong ki.
“Ngi kyntu ruh ia ka Sorkar ba kan pynbeit noh kloi ia kane ka kam namar lada ki ASHA ki bteng ka jingiakhih, kan ktah pat ia ki paidbah nongshong shnong ka Jylla. Ngi kyntu ruh ia ka Sorkar ba kam dei ban pyntieng pynsmiej ia ki nongtrei ASHA ba kin shah weng kam lada kim sangeh ka jingiakhih namar lada ka Sorkar ka bakla ban shim rai bad weng kam ia ki ASHA kiba iakhih ban dawa ia la ka hok, na ka liang ka Seng ruh kam banse ban mih shakhmat bad iakhih pyrshah ia ka Sorkar Jylla” la pynkut u nongialam ka HYC.
