Shillong Risaw 23: Ka Jaintia National Council (JNC) ha ka sngi U Blei kala kyntu ia ki Myntri Sorkar kiba dei na Ri-lum Jaintia, ba kin shimkhia bad iakren halor ki jingduna ki kam pynroi hapoh ka thain (Ri-lum Jaintia) ha ka jaka ban tynruh ia ka lynti rel.
“Ngi kyntu ia ki Myntri Sorkar na Jaintia ba kin pynpaw ia ki jingeh ka thain ha ka Kynhun Myntri…bad ban kren ruh halor ka jingsahdien jong ka East Jaintia Hills District la ka dei ha ka jingsiew shaba palat ki surok, ka jingbym treikam ki skul Sorkar, ka jingbym biang ki hospital Sorkar, ka jingsahteng ka jingdawa college Sorkar bad kiwei kiwei ha ka jaka ban kren halor ka lynti rel” ong u samla Sambormi Lyngdoh, President ka JNC ha ka kyrwoh.
Kane kala mih tang arsngi hadien ba uwei u Nongialam na ri-lum Jaintia bad Myntri Sorkar bah Comingone Ymbon ula rai ban pdiang ia ka sienjam jong ka Sorkar ha kaban wanrah ia ka lynti rel ha East Jaintia Hills District.
Haba kdew ia ki daw ba ka JNC ka pyrshah ia ka lynti rel, u Bah Sambormi ula ong ba ka Jaintia Hills Autonomous District Council haduh mynta kam pat shym la lah ban wanrah ia ki ain kiban khang ia ka jingwan khaii ki bar jylla hapoh ka thain bad ban pynkupbor ia ki Dorbar Shnong ba kin tehlakam ia ka jingwan rung ki bar jylla ha ki shnong ki thaw.
U ong ba dei namar kane, lada ailad ia ka jingwan sa ka lynti rel, khlem artatien kan don bun bah ka jingwan rung ki bar jylla sha ka thain. Namar kara, ki paid riewlum ka Jylla ki don ia ka hok ban pyrshah ia kum kine ki project.
“Ngi ngeit skhem ba ka jingwan jong ki lynti rel kin ktah jur ia ki jaka nongkyndong, ki khlaw, ki lum bad ki wah, ki pung bad ruh ia ki trai shnong kiba dang shaniah ha ki lynti khlaw. Ka East Jaintia Hills ka dei kawei ka District kaba don bun bah ki karkhana bad da ka jingwan ka lynti rel, kan pynmyntoi tang ia ki bad ka jingkylli ka long halor ki nongkhaii trai jylla bad ki nongniah trok” ula ong.
Haba pynpaw ba ka lynti rel kan pynmyntoi ia kiba nabar, une u Nongialam ka JNC ula ong “Ki nongwan buhai shnong beain kin nang kiew, ka jingiashongkha khleh kan jia beit khamtam ha ki jaka nongkyndong. Ngi ngeit skhem ruh ba kan pynkha ia ka jingeh kaba khraw khamtam ha ka jingialeh ban pynneh pynsah iala ka riti ka dustur bad ka jinglong ba kyrpang. Kaei kaban jia ia ki pateng jong ngi ki ban dang wan”.
Haba ban jur ba ka District ka donkam palat ia ka roi ka par ym ka lynti rel, u samla Sambormi ula ong “Ka Council ka kwah ruh ban buh jingkylli ba lada ka Sorkar ka don pisa da ki klur ban wanrah lynti rel balei ia ka college Sorkar? Artylli ki residential school kiba la shu ieh ha ka District, ka pyrkhat aiu ia kane?”.
Ula maham ruh ba ka JNC ka kloi ban shim ia kano kano ka sienjam lad aka Sorkar kam sangeh noh ha kaban phohsniew ia ka lynti rel ha East Jaintia Hills.
 ha ka sngi U Blei kala kyntu ia ki Myntri Sorkar kiba dei na Ri-lum Jaintia, ba kin shimkhia bad iakren halor ki jingduna ki kam pynroi hapoh ka thain (Ri-lum Jaintia) ha ka jaka ban tynruh ia ka lynti rel.){kind=link}