Nongpoh, Risaw 20: Ka samla Divya Tado kala ioh ban rah ia ka nam kum ka ‘Miss Ri-Bhoi College 2023’ bad u samla Pynsuklang Sohtun kum u ‘Mr Ri-Bhoi College 2023’ ha ka jingiakop ba long hynnin ka sngi Palei kum shibynta jong ka College Week.
Kane ka college week kala kut noh hynne ka sngi Thohdieng bad la wan pynhap pyrda ia ka da u MLA ka Nongpoh Bah Mayralborn Syiem hapdeng ka jingishongkun bad ba iphuh iphieng.
Kiba la iadonlang ki kynthup ia u Bah S.O Lyngskor Vice President Governing Body kum u symbud kongsan, u Principal ka Ri Bhoi College E.C Benny, ka Kong W K Blah, Principal Alpha English Hr. Sec. School, Bah R R Makdoh, ki nonghikai ka Ri-Bhoi College, ki samla pule lem bad kiwei kiwei.
Haba kren ha kane ka sngi, u Bah Mayral Born Syiem, u la ai ia ka jingiaroh ia baroh ki samla pule lem bad ki nonghikai kiba la lah ban pyniphuh iphieng ia ka jingrakhe lehkmen kaba shitaiew.
U la pynpaw ruh, ba kum u nongmihkhmat paidbah, u la sakhi ia ka jingnang roi jong kane ka jaka pule na kawei ka por sha kawei pat lyngba ka jinglen lade da ki nonghikai, ki nongtrei jong kane ka kolej naduh kito kiba dang don mynta bad kito kiba la khlad noh na kane ka sla pyrthei.
Une u MLA ula shim ruh ia ka bynta ban sam ia ki khubor bapher bapher sha ki nongjop ha ki jingiakop ba la pynlong ha kane ka taiew lehkhmen kynthup ruh ia ka Miss bad Mr Ri Bhoi College.
