Shillong Risaw 13: U Chief Executive Member (CEM) ka Khasi Hills Autonomous District Council u Bah Pyniaid Sing Syiem, ula ong ba ka Executive Committee bad ki MDC ka KHADC ki don ia ka jingkitkhlieh naka bynta ki paidbah ha Block II bad lada don mano mano kiba pynwit kin ym salia ban hiar sha Block II wat shiteng miet ruh.
U CEM ka KHADC ula kren ia katei, hadien ba ki nongialam jongka Synjuk ki Rangbah Shnong Border Area Raid Nongtung, jongka thaiñ Block-II kila wan kyrpad ia u ban iakren lem bad u CEM ka Karbi Anglong Autonomous Council halor ka jingshah lum khajna ki nongrep.
“Ka KHADC baroh, ka Executive Committee bad baroh ki Executive Member bad ki MDC ki don ia ka jingkitkhlieh na ka bynta ki paidbah ha Block-II bad ngi don iaka jingsngewkhia na ka bynta ka bha ka miat jongki bad lada don mano mano ba pynwit, ngim salia ban hiar sha Block II wat shiteng miet ruh” ong u CEM.
“Ngi lah iakren rangbah bad ki (Synjuk) bad ngin ym aili ia kino kino kiba pynthud ia ka shongsuk shongsaiñ hapoh ka Block II khamtam ban pynwit ia ki paradoh parasnam ki jong ngi” ula bynrap.
Ha kaba iadei bad ka jingpynieng ia ki 5 tylli ki khyrdop lum khajna da ka KAAC, u CEM iathuh, ba ha ka jingiakren bad ka KAAC, kitei ki khyrdop kidei kiba la don la slem bha bad hynne hi, hakhmat jong ki nongialam ka Synjuk, ula phone ia u CEM ka KAAC u Dr Tuliram Ronghang bad ia u MAC katei ka thaiñ u Abhijeet ban pynsngew ia ki jingeh jong ki nongshong shnong ha Block II.
“Ngi la pynpaw ba kino kino ki marrep kiba kynthup ia ki jhur, synsar, ki diengïap ne kino kino ki jingdonkam jong ki Khasi ha Block II kin ym dei ban shah shim khajna. Ka khyrdop ka lah ban don ia mynta katba ngi dang don hapdeng ka jingiakren bad ki hynrei kim dei pat ban lum khajna” ula ong.
U CEM u pyntip ruh “ Ngi lah pynbeit ba kan don ka jingiakynduh lang jong ka EC jongka KHADC bad ka EC jongka KAAC ban iasyllok bad ia phylliew jingmut ha kaba iadei bad kiba bun ki jingeh ha ka thain”.
Ula ong, ba ka KAAC kam dei ban khanglad ia ki nongshong shnong ban pom ia ki diengïap na ki khlaw shnong Khasi ban ioh pyndonkam ha kaban shet ban tiew namar ka jingpom ia ki dieng kam dei satia da ki dieng kiba dang im hynrei kidei ki diengïap.
Ha kaba iadei bad ka jingpynthud ia ki kam pynroi ha ki shnong Khasi, la iakren ba kam dei ban jia shuh bad lada don kano kano ka lad jingiarap naka sorkar jylla ne KHADC kidei beit ban pdiang.
