Shillong, Risaw 13 : Ka Nongaiktien ka Sorkar Kong Ampareen Lyngdoh ha ka sngi Thohdieng kala pyntip ba ka Sorkar Jylla kala pan jingtip na ki tnad ba dei khmih ban ai jingtip ia ki sngi shong jingialang (iterenary) jong ka Expert Committee, kaba shong bishar ia ka Job Reservation Policy ka Jylla.
“Mynta ngi dang pynkhreh ban pan jingtip na ki Tnad ba dei khmih ba kin pyntip ia ki sngi lane ki plan jong ka Expert Committee ba kan shong jingialang” ong ka Kong Ampareen haba iakren bad ki nongthoh khubor.
Kala ong “Ngan sa shim ia ki jingtip ba donkam bad ngan sa kyntu ia ki ba kin shong bad kuma nga ong, ka tnad Home(Political) kan dei ba tnad a lamkhmat ka ban iashimbynta ha ka jingialang jong ka Expert Committee”.
Haka 25 tarik Nailar, ka Sorkar kala thung ia u Judge barim ka Madhyra Pradesh High Court Justice (Retired) Mool Chand Garg kum u Chairman ka Expert Committee bala thaw da ka Sorkar Jylla ban shong bishar thymmai ia ka Job Reservation Policy.
Ia u Judge barim ka Allahabad High Court, Justice (Retired) Dr Satish Chandra la thung kum u Expert member ha ka Constitutional Law. U Justice Chandra u dei ruh u President barim ka Custom, Excise and Service Tax Appellate Tribunal.
Ki lain gut kiwei pat ki Expert Member ki dei u Prof DV Kumar from Department of Sociology, NEHU, Shillong kum u Expert member ha ka Sociology, Prof Chander Shekhar n aka Department of Fertility and Social Demography, Indian Institute of Population Sciences, Mumbai kum u expert member ha ka population studies badProf Subhadip Mukherjee, Assistant Professor of Economics and Public Policy ha IIM, Shillong kum u expert member ha ka Economics.
Ha kajuh ka por, ka Myntri ka pyntip ba ia ka dorkhas bala aiti da ka HITI halor ka Reservation Policy ha ka por pynrung klas ia ki samla ha ki jaka pule ka Sorkar, yn sa phah sha ka Ophis u Myntri Rangbah Conrad K Sangma ba un leh ia kaba donkam.
