Shillong, Naitung 19 : Ka Nangkiew Irat ka la ioh ban pynliem da 3-1 kol ia ka Malki Sports Club ha ka jingiakhun ia ka lympung Shillong Premier League hynne ka janmiet ha madan Third Ground Polo.
Ha ka kylla step ka jingialehkai ka la long kaba mar ia biang bor bha hynrei dei tad ha shwa ban kut ka kylla step kata ha ka minit kaba 45 ba ka Nangkiew Irat ka la ioh ban thep shi kol lyngba u Dame Syih kaba pynlong artad ia ka kynhun ban ioh lamkhmat da 1-0 kol.
Ka jingialehkai ha ka kylla miet ka la nang shongshit shuh shuh namarba ka Malki ka la iakhun tyngeh ban ioh pynphai ia ka kol kaba shah thep ha ka kylla step. Hynrei ha ka por bym poi pyrkhat kata ha ka minit kaba 57 ka Nangkiew ka la ioh biang sa shi kol lyngba u Dame Syih.
Katba iaid ki minit ialehkai ka Malki watla ka pyrshang tyngeh ban thep kol ruh kam shym la iohlad satia ban pynkhih ia ka jar jong ka liang pyrshah. Kumta kane ka rukom ialehkai ka la iai bteng tad haduh ka minit kaba 68 ba ka Nangkiew ka ïoh thep biang sa shi kol lyngba u Shaibor Nongrum bad pynlong ia ka kynhun ban ioh lamkhmat haduh 3- 0 kol.
Na ka liang ki rangialehkai ka Malki sa shisien ki la nang iakhun tyngeh bad kane ka la plie lad ia ki ban ioh thep lem shi kol lyngba u Khraw Tamu ha ka minit kaba 90 kaba dei artad ka minit ba khatduh jong ka por ialehkai
Kumta tad haduh ban da kut ka por ialehkai ka Nangkiew Irat ka la ioh ban khur suk ia ki lai point da kaba pynliem 3-1 kol ia ka Malki.
Ka jingiakhun ha kane ka sngi Balang pat ka long hapdeng ka Mawkhar SC pyrshah ia ka Mawlai SC ha ka por 4:00 baje janmiet.
