Shillong, Risaw 03: Ka seng Hynniewtrep National Youth Movement (HNYM) hynne ka sngi Ba-ar, kala phah biang daka dorkhas sha u Symbud Myntri Rangbah ka jylla ba khmih ia ka Tnad Pynroi Sor bah Sniawbhalang Dhar, ban pynkynmaw halor ka jingpyrshah ban thaw ia ka jaka theh nuit thymmai ha Nonghali, East Khasi Hills.
Haka dorkhas, ka HNYM ka pynkynmaw ba ka sorkar jylla lyngba ka tnat pynroi sor ka don jingthmu ban thied jaka ha Lumsohlait kaba don hapoh ka shnong Nonghali ban pynkylla jaka theh nuit.
Ka seng kala pyntip ruh ba haka 24 tarik Nailur ka tnat pynroi sor kala leit jurip ia kane ka shnong khlem da kynjoh ktien iaki nongshong shnong Nonghali kiba ieng skhem ban pyrshah jur ia kane ka jingthmu ka sorkar jylla ban pynkylla Marten ba ar ia kane ka shnong.
“Ka jaka Lumsohlait hapoh ka shnong Nonghali ka jngai tang 500 metres na shnong ba sah briew bad katkum ka ain Waste Management Act ka sorkar jylla, ym shah ban pynlong jaka theh nuit haki jaka kiba don ka jingjngai tang 800 meter na jaka sah briew” la ong ka dorkhas ka HNYM.
Haba iadei bad kane ka HNYM ka dawa na u symbud myntri rangbah ka jylla u bah Sniawbhalang Dhar ban jubab iaka dorkhas haba iadei bad ka jingthmu ka tnat pynroi sor ban pynkylla jaka theh nuit hapoh Lumsohlait kaba don hapoh ka shnong Nonghali lym kumta ka seng bad ki paidbah nongshong shnong kin mih ban iakhih.
