Shillong, Naitung 18: Kum shibynta ban kynmaw burom ia ka lyngkhuh sngi iap ba 187 jong u Syiem Tirot Sing, ka Khasi Students Union-NEHU Unit kala pynlong da ka jingialehkai phutbol paralok bad ka MeECL Friends United hynne ka sngi ha Madan SAI, Mawlai.
Ka jingialehkai ka long kaba itynnad bad iakhaid bha haduh ba kut ha ka ba ka KSU Nehu unit ka lah lah ban pynliem noh da 2-1 ia ka MFU.
Hadien ba lah dep ka jingialeh kai lah pynbud pat da ka jingialang ba lyngkot ban kynmaw burom ia u Tirot Sing uba la len lade ban iakhun pyrshah ia ka sorkar Bilat.
U samla Banlumlang Rani president jong ka KSU NEHU Unit ula pynpaw ia ka jingsngewnguh ia ki nongialehkai jong ka MeECL friends united ba ki lah pyllait por khnang ban ioh ia lehkai kilan met bad kynmaw burom lang ia u khlawait ka jaitbynriew ryngkat bad ki dkhot ka seng.
U lah pynpaw ruh ba ki samla pule ha NEHU watla ki dei kiba wan na kylleng ka Bri u Hyññiewtrep hynrei ki don ia ka jingsngewthuh ia ka jinglong kawei hapoh ka shatri jong ka KSU. Ula ban ruh ba kum ki samla pule kin iakhun lane pyrshang ban shakri ia ka jaitbynriew lyngba ka bor jabieng bad u khulom hynrei lada ka por ka dawa pat kim banse bad long kiba lah khreh ban sei ki wait ki tiar ialeh ban iakhun pyrshah ia ki nongshun lane ki nongthombor ia ka jaitbynriew.
