Shillong, Naitung 18: U MLA ba marwei ka KHNAM na North Shillong Bah Adelbert Nongrum hynne ka sngi nyngkong ula pynpaw ba u long uba kloi ban leit iasoh sha ka BJP lada ka Sorkar ha Delhi ka pyntreikam noh ia ka Inner Line Permit (ILP) bad pyllait ia ka Meghalaya na ka jingtreikam ka Citizenship Amendment Act (CAA).
Kane ka jingpynpaw kala mih tang shisngi hadien ba u Bah Adelbert ula pynbna ia ka rai ban mih noh na ka KHNAM bad ban leit iasoh noh sha kiwei pat ki party hashuwa ka elekshon MLA 2023.
“Lada ka BJP ka mut hok bad long kaba kloi ban pyntreikam ia ka ILP bad leh eiei ia ki ishu ba nga la kren, nga long uba khreh ban iasoh bad ka BJP” ong u Bah Adelbert haba iakren bad ki nongthoh khubor.
Haba pynpaw ba kawei na ki ishu ba hakhmat eh ka dei ka ILP, une u MLA ula ong “Ka BJP ka dei ban pyndonkam da kajuh ka lynti kumba leh ha Manipur ban pyntreikam ia ka ILP ha Meghalaya” haba bynrap “Kaba ar, ka dei ban phiah mardor ia u pud u sam hapdeng ka Meghalaya bad Assam. Ka Assam ha ka kyrteng jong ka roi ka par, kala knieh ia ki jaka bad pyndik ia ki paidbah kiba sah ha khappud. Namar kata, nga kyrpad ia ki MLA ba kin ai kham bun ka skhim pynroi sha kine ki jaka”.
“Lada ka BJP ka kwah ban khot ia nga, sngewbha pynurlong shuwa ia kine ki ishu” ula ong haba dawa ia ka Sorkar Jylla ban pyllait noh pura ia ka Meghalaya naka jingtreikam ka CAA.
Haba kylli, u bah Adelbert ula ong ba ka jingiashrut hapoh ka KHNAM kala pynkutlad ia u bad hap shim rai ban mih noh na kane ka party khnang ban plie lynti ia ki ba kin ialam ia ka Party kat kum ka jingkwah jong ki.
“Nga la ap la slem bha. Nga dei u MLA ba marwei bad ki dei ban burom ia nga. Ngam ju iaid lait ia ki nongrim jong ka party lait noh tang ban iakhun ia ki jingeh jong ka Jylla. Nga la rai ban mih noh ban plie lynti ia ki ba kin ialam ia ka KHNAM da ka jingsuk” ula ong.
“Namar kata, nga tyrwa ialade sha kino kino ki party kiba kwah ban pdiang ia nga ba ki dei ban pdiang ruh ia ki nongrim jong nga bad ki ishu kiba ktah ia u paidbah ka Jylla” ula bynrap.
U Bah Adelbert ula ban jur biang ia ka jingdonkam ban pynthymmai noh ia ka State Reservation Policy jong ka Jylla.
