Shillong, Naitung 19: Ka Dorbar Shnong Mawbah ryngkat u MLA ka thain Bah Mohendro Rapsang ha ka sngi Ba ar ki la leit ban kynduh ia u Symbud Myntri Rangbah ka Jylla Bah Prestone Tynsong ban pynpaw ba ki pyrshah jur ia ka jingthmu jong ka sorkar ban pynkynriah noh sha Mawbah ia ki briew kiba sah mynta ha Iew Themmawlong.
Haba kren bad ki lad pathai khubor, u Bah Rapsang u la iathuh ba na ka liang ka Dorbar Shnong ryngkat bad u kum u nongmihkhmat ki la dep ruh ban iasyllok bad ki nongshong shnong ban tip ia ka jingsngew jong ki halor katei ka jingthmu jong ka sorkar.
“Haba na ka liang ki nongshong shnong ki ong ngim kwah, nga ruh kum u nongmihkhmat nga hap ban donlang bad ki ban pyrshah,” u la ong da kaba iathuh ba ka shnong ka la dep pynpaw markhmat ba katei ka shnong nalor ba ka la khapngiah lypa kan sa nang khapngiah shuh shuh lada wanrah sa kitei ki nongshong shnong na Them Iewmawlong.
U MLA u iathuh ruh ba ha ka jingiakren na ka liang u Bah Prestone ba dei ruh u Chairman ka High Level Committee u la pyntip ia ki ba ka Mawbah ka dang dei kawei na ki jaka ba ki jied bad kam dei satia kaba ki la jied.
“Katkum ka jingong jong u Bah Prestone, mynta ka sorkar ka dang wad sa kiwei ki jaka khnang ba kin ioh ban phiah ia ki nongshong shnong la ka jong ka jong khyndiat khyndiat,” u la ong.
U Rangbah Shnong Bah David Syiemlieh u la ong ba lada ailad ia kitei na Them iewmawlong ba kin wan sah ha Mawbah kan sa wanrah ka jingkhapngiah kaba jur namar tang na ki nongshong shnong ba la don lypa ruh ki la bun lypa.
U ong ruh ba na ka shnong ki kyntu jur ia ka sorkar ba ka dei ban burom ia ka jingsngew jong ki nongshong shnong halor katei ka phang.
