Shillong, Nailur 26 : Ka Federation of Khasi Jaintia & Garo People (FKJGP) kala lap ba bun ki bar jylla kila kyntur pud beain sha ki jaka ka Sorkar Jylla ha Keating Road, Shillong, da kaba seng dukan bad shna iing khlem da ioh jingbit.
Ka FKJGP kala lap ia kane ha ka jingkhynra Trading Licence bad Labour Licence ia ki dukan ki bar jylla hynne ka sngi Ba-ar ha kane ka thain, kaba don ba them ba mar pyrshah ka Main Secretariat.
Ia kane ka jingkhynra la pynlong da ka FKJGP Malki Circle ha ryngkat ki nongialam ka Seng Kmie lem bad ka Shillong Municipal Board (SMB).
Ha ka jingkhynra,ka FKJGP kala shem ba bun ki dukan bad ki iing kila kyntur wat sha ki nala bad ki surok jong ka Tnad PWD kila lam naduh Keating Road sha Khyndailad.
Halor kane ka jingshem, ka FKJGP kala lum thup ia ka kyrteng jong ki briew kiba donkti ban kyntur pud sha ki jaka Sorkar, ki nala bad ki surok PWD ban phah kyndang mar mar ha ki bor ka Sorkar Jylla.
U Secretary ka FKJGP Malki Circle Bah Khraw Lynshing haba iakren bad ki nongthoh khubor, ula ong ba ka seng kala lap la bunsien ba ka Sorkar ka ju leh matlah haba phai sha ka jingkyntur pud jong ki bar jylla sha ki jaka Sorkar.
“Hynrei lada leh ki Khasi pat, khlem ka jingmap, ki kloi ban shimkhia bad leit kyndang wat ia ki Iing bad ki dukan” ula ong.
Une u Nongialam ka FKJGP ula buh jingkylli la ka Sorkar Jylla ka tieng mo ban leh eiei pyrshah ia ki bar jylla ba pynkhein ain haba kyntu ba ka Sorkar ka dei ban niew lang kumjuh ha kaban pynthikna ba ym dei ban leh shiliang ia ki jaidbynriew aiu aiu ruh.
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai
