Shillong, Nailur 25 : Ka Bharatiya Janata Party (BJP) hynne ka sngi Nyngkong, kala thung ia u Rikman Momin kum u Presdient ba thymmai ka BJP-Meghalaya ban shimti bujli ia ka shuki na u Bah Ernest Mawrie.
Kat kum ka shithi bala phah da u National General Secretary sha u State Incharge/State General Secretary (Org), Meghalaya, la pyntip ba kane ka jingthung ia u Rikman Momin kan treikam noh marmar.
U Arun Singh u pyntip ba ia u Rikman Momin la thung da u National President ka Party u Jagat Prakash Nadda.
Lah ban kdew hangne ba ia u Bah Ernest Mawrie, la thung kum u President ka BJP-Meghalaya ha ka 15 tarik Kyllalyngkot 2020 bad ka samoi treikam jong u, kala kut hashuwa ka elekshon MLA 2023.
Ka jingiakhih ban weng noh ia u Bah Ernest Mawrie naka shuki President kala jur bha ha ki snem bala leit noh khamtam na ki arngut ki MLA ka party bad ki Nongialam na kylleng ki District.
Ki jingkynnoh kila mih ruh pyrshah ia u Bah Ernest Mawrie ba u treikam kum u Nongialam tang ban pynhun paralok ne bahaiing hasem khlem da pyrkhat ia ka bha ka miat jong ka Party ha Jylla.
Kane ka jingbujli Nongialam kala mih tang hadien katto katne sngi ba u Bah Ernest Mawrie ula ong ba ki Nongialam na Delhi kin sa shim rai la un dang bteng ne em ban bat ia ka shuki President.
“Nga la pyndep ia ka samoi jong nga ba lai snem. La ngan bteng ne sangeh noh kan shong ha ka rai jong ki Nongialam na Delhi” ula ong.
U Bah Ernest ula ong ia kane haba kynthoh ia ka jingkren u MLA ka BJP na Pynthorumkhrah Bah A.L.Hek ba ka don ka jingthmu ban weng noh ia u Bah Ernest kum u President ka BJP Meghalaya.
Lah ban kdew hangne ba ka BJP ha u snem 2022, kala ai ticket ia u Rikman G Momin kum u kyrtong ban iakhun ia ka elekshon Lok Sabha na Tura.
