Imphal, Nailur 20 : Ki Pulit ka Manipur kila pyntreikam da ka Unlawful Activities (Prevention) Act bad Official Secretes Act pyrshah ia ki san ngut ki briew kiba shah kem ha ka sngi saitjain.
Kat kum ka jingiathuh ki Pulit, kine ki san ngut kila shah kem ha ryngkat bad artylli ki tiar siat- kawei ka INSAS rifle bas kawei ka self loaded rifle lem bad 128 tylli ki kuli, kiba la tuh n aka jaka buh tiar jong ki Pulit ha ki sngi ba sdang ka thma iapher jaidbynriew ha Manipur.
Uwei napdeng kine ki san ngut u dei uba la ithuh kum u dkhot barim ka People’s Liberation Army (PLA) bala 45 snem ka rta. Ia une u briew la pynngat ruh ha ka NSA nalor ka UAPA.
Ha ka 16 tarik Nailur hadien ka jingiohkem ia ki, ki paidbhur bala ialam da ki Kynthei na ka kynhun Meira Paibi, kila pyrshang ban thombor ia ka Police Station ba set ia kine ki briew.
Naduh ka sngi U Blei, kila don ki jingiakhih bad ruh ka pakhang shnong ba 48 kynta.Ka Meira Paibis kala dawa ba dei ban pyllait noh ia kine ki san ngut.
Ki pulit ki iathuh ba ki kynhun runar kila shim kabu ia ka jinglong jingman hapoh ka Jylla da kaba sdang mynta sa ia ki kam dawa pisa da kaba phong uniform shipai bad rah ia ki tiar siat ba khlain bor bala tuh na ka jaka buh tiar ki Pulit, ka ban sa ktah jur ia ka jingpyrshang ban wanrah ia ka jingshongsuk.
“Ngi la sdang ia ka jingkhynra pyrshah ia ki. Lada shem iano iano bad ki tiar siat, kin shah kem bad pynngat ha ki kyndon kiba eh” ong ki Pulit.
Ha kawei ka liang, ka jingim ki briew ha Manipur kala shah ktah biang ha ka sngi ba-ar, ka sngi ba sdang ka pakhang shnong ba 48 kynta bala khot pynlong da ki kynhun bapher bapher, kiba dawa ban pyllait noh ia ki 5 ngut ki briew ba shah kem.
