Guwahati, Nailur 17 : Kum shibynta ka jingrakhe ia ka lyngkhuh sngikha u Myntri Rangbah Duh ka Ri Narendra Modi, ka Assam kala pyrshang ban thaw ia ka Guinness Record ba thymmai da ka jingthung haduh shiklur tynrai ki dieng hapoh ka arkynta, ha kylleng ki jaka jong ka Jylla.
Ka Sorkar Assam kala niew ia kane ka jingiathung dieng kum ka Amrit Briksha Andolan.
Haduh 40 lak ngut ki dkhot jong ki Self Help Group ki kynthei na kylleng ki jaka ka Jylla, kila iashimbynta ha ka jingiathung mar artylli ki symbai dieng, kaba kot baroh sha ka 80 lak.
Ia ka 20 lak kaba sah, la thung da ki riew paidbah kynthup ki Anganwadi, ki nongrep slasla, ki heh Sorkar, ki Pulit, ki Forest Battalion, bad kiwei kiwei.
Ka Amrit Briksha Andolan ka dei kaba la leh da ka jingthmu ban kyntiew ia ka jingthung dieng hapoh ka Jylla. Nalor kane ka kam, ka Sorkar kala pyrshang ruh ban thaw haduh khyndai tylli ki Guinness world record ha kine ki taiew bala leit noh.
Haba kynthoh hapoh ka X (ba ju tip kum ka twitter), u Myntri Rangbah ka Assam Himanta Biswa Sarma ula ong “Mynta ka sngi nga la iashimbynta lang ha ka #Amritbrikshya Jan Andolan ban thung ia 1 klur ki symbai dieng, ka sienjam bala lamkhmat da ki paidbah ban pynrben ia ka jylla da ki dieng bad ka sawdong sawkun kaba khuid bad ruh ban rakhe ia ka sngikha jong u Champion ba shisha jong ka Green Planet, Adarniya Shri Narendra Modi ji”.
Assam creates history!
Today I joined the #AmritBrikshya Jan Andolan to plant 1 cr saplings, a citizen-led movement to build a tree economy, a clean environment and celebrate the birthday of a true champion of the Green Planet – Adarniya Shri Narendra Modi ji. @narendramodi pic.twitter.com/EmfMRd7YVv
— Himanta Biswa Sarma (@himantabiswa) September 17, 2023
Ha ki snem bala leit, ka Assam kala duh haduh 670 sqaure kilometre ki jaka khlaw hapdeng u snem 2011 bad 2022 bad 3060 kilometer ka jingsop khlaw ha ki 20 snem bala leit noh.
