Shillong, Nailur 13: Hapdeng ka jingialeh kaba jur ban kyntiew ia ka jingpynmih umphniang pal (palm oil) haka jong ka Ri, ka Meghalaya ka kwah ban kiar ialade na ka jingthung ia ki dieng palm ban pynmih umphniang namar ka jingsngewkhia halor ka jingpynjot ia ki khlaw ki btai bad ka jingktah ia ka mei maraing, nalor ka jingpyrshah jong ki paid Nongrep.
U James K Sangma, Nongialam ka National People’s Party bad Chairmen ka Meghalaya Industries Development Corporation bad kumjuhruh ka Myntri kam rep ka Jylla Kong Ampareen Lyngdoh, kila pyrshah jur ia ka sienjam bala shim da ka Sorkar Pdeng ban pynkhlain ia ka jingthung dieng palm.
Ka Myntri kam rep Kong Ampareen Lyngdoh kala ong ba ha ka jaka u dieng palm, ka Sorkar Meghalaya kan pynleit jingmut ha kaban iarap ia ki paid nongrep ba kin ioh kamai kham bun na ki mar rep ba ki pynmih lyngba ka jingkhaii bad jingpynlah dor.
U James Sangma ula ong “Nga sngewthuh ia ka jingkwah ka Sorkar Pdeng ban pynkhlain ia ka jingthung dieng palm, hynrei nga la pyrshah la slembha ban rep ia une u jingthung ha ki jaka lum kum jong ki naduh ba sdang ka jingialeh jong ka Sorkar Pdeng”.
Kumjuh ruh arngut ki MP ka Lok Sabha na Jylla nalor kiwei ki MP jong ka Thain Shatei Lam Mihngi kila iasoi ia ka shithi bala phah sha u Myntri Rangbah Duh ka Rib a kyrpad ia u ba un pyrkhat biang sa shisien ia ka jingthmu ban pynshlur ia ka jingthung dieng palm hapoh ka thain Shatei Lam Mihngi.
U MP ka Shillong Vincent H Pala bad MP ka Tura Agatha Sangma kila iasohkti lang bad u MP ka Assam Pradyut Bordoloi, Abdul Khaleque bad Gaurav Gagoi lem bad u ML ka Manipir Lorho S Pfoze ha ka shithi bala phah sha u Modi, kaba ong ba ka jingthung ia ki dieng palm ka wanrah ia ka jingktah kaba jur bha ia ka mariang ha ka thain.
Ha kajuh ka por, ha ka kyrwoh bala pynmih da ka Union Farm Ministry myn ha ka 30 tarik Naitung, lai tylli ki kompani pynmih umphniang palm ba kynthup ia ka Patanjali Foods, Godrej Agrovet bad 3F, kila iaid iasyllok bad ki nongrep ha man la ki Jylla.
Ki Jylla ba pynmih bun eh ia ka umphniang palm
Ki Jylla kiba pynmih bun eh ia ka umphniang palm ki dei ka Mizoram, Assam, Nagaland, Arunachal Pradesh, Telangana, Andhra Pradesh, Odisha, Karnataka, Tamil Nadu, Goa bad Tripura.
National Mission halor ka jingthung dieng Palm
Ka thong ba hakhmat eh halor kane ka Mission ka long ban pynbun ia ka jingthung dieng palm oil sha ka 10 lak hectare bad ban pynmih ia ka umphniang palm sha ka 11.20 lak ton shuwa u 2025-2026. Ka thong hi ka long ban pynduna ia ka jingthied umphniang palm jong ka Ri India na shabar.
Lah ban kdew hangne ba ka India ka dei ka nongthied palm oil ba khlain duh ha ka pyrthei bad ki nongpyndonkam ia ka palm oil.
 haka jong ka Ri, ka Meghalaya ka kwah ban kiar ialade na ka jingthung ia ki dieng palm ban pynmih umphniang namar ka jingsngewkhia halor ka jingpynjot ia ki khlaw ki btai bad ka jingktah ia ka mei maraing, nalor ka jingpyrshah jong ki paid Nongrep.){kind=link}