Guwahati, Naitung 16 : Ka jingpang Japanese Encephalitis (JE) ka la shim ia ka jingim jong ki 23 ngut ki briew ha Assam naduh u bnai Iaiong mynta ka snem, ong ka khubor heh sorkar.
Ka jingsaphriang kynsan ka jingpang Japanese Encephalitis lyngba ki skain pyrjong ka ba dei ruh ka jingshitom ka ba ktah ia ka jabieng ka la nang jur bad buh jingma shibun ha kane ka jylla.
Katkum ka National Health Mission ka Assam, ki la don haduh 23 ngut ki briew ki ba la iap ha ka jylla naduh u bnai Iaiong ba la dep ka ba la pynlong lyngba u khniang jingpang Flavivirus u ba lah ban ktah ia ki briew bad ia ki mrad kumjuh.
Tang ha kine ki 24 kynta ba la dep saw ngut ki briew arngut na ka jaka ba shah ktah ha ka jingshlei um ha Morigaon bad ar ha Nalbari district ki la khlad noh na kane ka jingpang ha ka jylla, ka ba la kyntiew ia ka jingdon jong baroh ki ba iap sha ka 23 ngut.
Ka NHM ka la ong ba ki la don kumba 16 ngut kiwei pat ki ba la shah ktah thymmai ha kane ka jingpang Japanese Encephalitis ha ka jylla tang ha kine ki 24 kynta ba la dep.
Napdeng kine, sawtylli la lap ha Nagaon, mar lai ha Nalbari bad Udalguri, ar ha Sivasagar bad mar iwei ha Barpeta, Kamrup (Metro), Karbi Anglong East bad Hojai district.
Haduh mynta ki la don haduh 160 tylli ki case ki ba iadei bad ka jingshah ktah ha kane ka jingpang Japanese Encephalitis ha ka jylla baroh kawei.
Na ka liang ka tnat ka koit ka khiah ka sorkar jylla ka la hukum ia baroh ki bor district na ka bynta ban thaw ia ka kynhun ba kyrpang hapoh ki district bad ban shim ia ki sienjam ban tehlakam ia ka jingsaphriang kane ka jingpang Japanese Encephalitis (JE) bad Acute Encephalitis Syndrome (AES).
