Shillong, Naitung 16: Ka Meghalaya Pradesh Trinamool Youth Congress (MPTYC) kala ther tyngeh ia ka Sorkar Meghalaya Democratic Alliance (MDA) namar ka jingpynbor ia ki Nonghikai ba kin mih sha surok ban iakhih.
“U Conrad K Sangma ula kular baka pule puthi ka dei ka mat treikam ba hakhmat eh jong ka NPP hynrei balei ba ka pynbor ia ki Nonghikai ban mih sha surok lada ka pule puthi ka dei kaba shimkhia hakhmat eh” ong u samla Fernandez S Dkhar, President ka MPTYC haba iakren bad ki nongthoh khubor hadien ka jingialang ba nyngkong eh jong ka State Executive Committee ba long hynnin ka sngi.
Une u Nongialam ki samla ka TMC ula kren halor ka rai jong ki Nonghikai SSA ban pynlong ia ka jingiakhih ba khlem pud ban pyrshah ia ka Sorkar Jylla halor ka jingbym lah ban pyllait ia ka tulop ba 5 bnai, kaba jia tang hadien katto katne ba ki Nonghikai Adhoc kila hap thiah surok ban ioh ia ka jingdawa pynkiew tulop.
“Ym tang ki Nonghikai SSA, ki Nonghikai Adhoc kim shym la kmen bad ka jingpynkiew tulop jong kane ka Sorkar” ula ong.
Ula kam ba ha ka por ba synshar u Nongialam ka Liang Pyrshah Dr Mukul Sangma kum u Myntri Rangbah ka Jylla, ka Sorkar ha katei ka por kala pyrshang ban pynkiew ia ka tulop ki Nonghikai kaba da don jingmut shisha.
“Ka Sorkar ha kane ka por kala pynkiew ia ka tulop ki Nonghikai SSA n aka T.6000 sha ka T.9000 bad hadien sha ka T. 20000. Hadien ka jingpynkiew tulop jong u Dr Mukul ha u snem 2016 bad 2017, kala poi mynta sha ka hynriew snem. Namar kata, kala dei ka por ba ki Nonghikai kin ioh ia ka jingsiew kaba biang. Hynrei, nga ieh ha ka sorkar ba kumno kan leh halor kane” ula bynrap.
