Shillong Nailur 09: Ka Synjuk Waheh Shnong, East Jaintia Hills District, kala pynpaw ia ka jingsngewkhia bad pynrem jur ia u Waheh Shnong ka Thangskai, halor ka jingai syrnot nong shongshong ia uwei u bar jylla ha shnong Thangskai, kaba la ktah mynta wat ia ka bhah pule doctor jong ki khun ka Bri U Hynñiewtrep.
Ka Synjuk kala shim ia kane ka rai ban pynrem ia une u Waheh Shnong ka Thangskai ha ka jing ialang jong ka Executive Committee ba long hynne ka sngi.
“Ka jingialang jong ka Executive Committee da kawei ka sur kala rai ban pynrem jur halor ka jingnud jong u Waheh Shnong, ka Thangskai, East Jaintia Hills, ba ai sertiphiket nongshong shong bapura ia u wei u barjylla u bym dei satia u trai ri trai muluk na ka shnong Thangskai bad ka jingleh jong u Waheh Shnong ka Thangskai, nalor ba kala tuh ia ka bhah pule doctor jong ki khun ka Bri U Hynñiewtrep, kan ktah ruh ia ka jaitbynriew trai ri trai muluk ba rit paid hadien habud. Ka SWS-East Jaintia Hills District, ka pynrem jur ia kane ka jingleh jong utei u Waheh Shnong,” ong u Hambertus Nongtdu, President jong ka SWS-EJHD lyngba ka kyrwoh khubor.
U President ka synjuk, ula ong kane ka jingleh jong une u Waheh Shnong, kala wanrah ruh ia ka jingjah burom bad ruh ka jingduh jingshaniah ia kiwei pat ki Waheh Shnong jong ka East Jaintia Hills District.
Ka synjuk ka dawa na ka Dorbar Shnong, Thangskai bad ruh na ki bor sorkar kynthup ia ka JHADC, ban pynduh pyndam noh shi syndon ki ia katei ka sertiphiket jong utei u bar jylla.
Ka SWS-EJHD, kala rai ban kyntu lane pynkynmaw ia baroh ki Dorbar Shnong lane ki Waheh Shnong ha East Jaintia Hills District, ba ki dei ban long kiba husiar bha ha kaba ai ia ki jait setiphiket bapher bapher, khnang ba kane kan ym buh ia ka ri bad ka jaitbynriew rit paid ha ka jingeh.
“Ha kajuh ka por, ka synjuk, mynta hi ka sngi, na ka bynta ka iap ka im jong ka ri bad ka jaibynriew ka la rai ba lada long kaba lah, nangne shakhmat yn shna noh tang kawei ka dur ka dar (format) na ka bynta ki sertphiket bapher bapher ia kiba yn sa pyndonkam beit bad ryntih ha baroh ki shnong ha East Jaintia Hills District, bad ba, kat kum ba long mynta, kane ka kam ka dang don hapoh ka jingbishar bniah jong ka SWS-East Jaintia Hills District”, la pynkut u kyrwoh na ka SWS-East Jaintia Hills District.
