Shillong, Nailur 05 : U Myntri ka Tnad Social Welfare Bah Paul Lyngdoh ha ka sngi Ba-ar, ula pyntip ba ka Sorkar Jylla kala rai ban pynkha sa 3000 tylli ki Anganwadi Centre ha kylleng ka Jylla ban pyntreikam ia ka Meghalaya Childhood Early Development Mission (MCEDM).
U Myntri ula pyntip ia kane haba iashimbynta ha ka ‘Play to Learn Summit’ bala pynlong da ka Meghalaya Early Childhod Development Mission Society (MECDMS) ha Windermere, Umpling.
Haba iakren bad ki nongthoh khubor, u Bah Paul ula iathuh ba palat 60,000 ngut ki Khynnah ha kylleng ki Anganwadi Centre kila shah kynthup ha kane ka Mission. Ka jingthmu jong ka Mission ka long ban wanrah ia ki kot pule (curriculum) khnang ba ki Anganwadi Centre kin long ki jaka pule ym tang ki jaka ai jingbam tei met.
“Ha ka bynta ba nyngkong, ngin pynkha sa 3000 tylli ki centre khnang ban lah pynsted ia ka jingtreikam ka Mission ha kine ki centre. Haba kut jong kane ka san snem, ngi buh thong ban kynthup ia baroh ki shnong hapoh ka Jylla” ula ong.
U Bah Paul ula ong ba ka Sorkar Jylla kan iatehlok bad ka Asian Development Bank ban pyntreikam ia ka Mission.
“Ka jingiakren jong ngi bad ki (ADB) ka long kaba sngewtynnad haduh mynta bad ngi thikna ba kin sa iasnohkti lang bad ngin sa sam ia ki jingtip ba bniah hadien ba ngi la dep iasoi ia ka MoU bad ki” ula bynrap.
Haba pyntip ba ka MCEDM bala pyllait mynshemsnem ka dei kaba nyngkong eh hapoh ka Ri, u Myntri ula ong “Kane ka dei ka sienjam bala shim da u Myntri Rangbah ka Jylla Conrad K Sangma, uba la shimkhia ia ka thong jong u Myntri Rangbah Duh ka Ri bad don ka jingiasyllok bad u bad ka thong jong ka Mission hi ka dei ban kyntiew ia ka khie ka san jong ki khynnah haba pynleit jingmut khamtam eh ha ka pyrkhat pyrdain bad ka met ka phad”.
