Shillong, Nailur 04: Ka Hynniewtrep National Liberation Council (HNLC) ha ka sngi Nyngkong kala iai ban biang ia ka jingdawa ba ka Sorkar ka dei ban pyndam noh ia baroh ki case pyrshah ia ki Nongialam kaba iasyriem ia kaei kaba la leh da ka Sorkar Nagaland na ka bynta ka NSCN (IM) ha u snem 2002.
“Ka Sorkar kam dei ban shukor ne ialam bakla ia ka HNLC. Ngi khmih lynti ba ka Sorkar kan pyndam shuwa ia baroh ki case, kumba leh ka Sorkar Nagaland ha u snem 2002. Lada ka Sorkar Nagaland ka lah ban leh, balei ka Sorkar Meghalaya ka artatien ban bud lang?” ong u General Secretary cum-Publicity Secretary ka HNLC Bah Sainkupar Nongtraw ha ka kyrwoh.
Haba niew ia ka jingkren u Symbud Myntri Rangbah ba khmih ia ka Tnad kam Pohiing (Police) Bah Prestone Tynsong kum ka “kam kai suda” u Bah Sainkupar ula ong “Ha ka jingkren u Bah Prestone ba iadei bad ka notice ka Iingkashari ba khot hajir ia nga kum u General Secretary, kala paw shai ba ki kyntien jong u ki long kiba kamkai. Ka jingkylli kaba mih ka long-Mano ba bat ia ka bor ban thung ia ki Nongbishar jong ka Supreme Court bad High Court?, ka bor ban map noh ia kino kino ki seng bala khein beain ka shong ha ka bor synshar jong ka Sorkar Jylla”.
Ula ong ba ha kiba bun ki Ri, ki dei ki Khliehduh jong ka Jylla ne ki Khliehduh ka Sorkar, kum u President ne Myntri Rangbah Duh, kiba don ia ka bor ban map noh ia kiei kiei baroh.
Ha kawei ka liang, ka kamram jong ka Iingkashari ka long ban shong bishar bad pyndonkam ia ka ain, ha ka jaka ban ai jingmap.
U Bah Sainkular ula ong ban ai nuksa haba iadei bad ka NSCN (IM), shuwa ba ki nongialam Naga kin wan rung sha India na ka bynta ka jingiakren iasuk ha u 2002, ka Sorkar Nagaland kala weng noh ia baroh ki case pyrshah ia ki. Haba peit ia kiei kiba la jia, mano ba don ia ka bor ban map noh ia ka Mizo National Front?.
“Lada kylli ia u Bah Prestone halor ki kam bymmab ba shyrkhei, ka jybab jong u ka long pyrdet ia ka jingkren jong u CM bad ki bor ka MHA bad u AK Mishra, u kdiang. Ka jingong u bah Prestone ba ka kam bymman ka dei ka kam bymman, ka iatakhuh bad ka jingngeit baka lah ban don ka jingiapher ha ka jing long khraw jong ki kam bymman bapher bapher” ula bynrap.
Haba kynnoh ba ka don ka jingpynap shrip bala pynkhreh lypa ia ki Nongialam ka HNLC, u Bah Sainkupar ula ong “Lada u Bah Prestone u iasaid baka dei tang ka kam ba ju leh da ka Iingkashari, hato kane ka mut ba lada u Chairman bad u General Secretary ki ioh ia ka hukum shah kem (arrest warrant), ka Sorkar kan ym lah ban tuklar namar ka jingiaphiah ia ka bor hapdeng ka bor synshar ka Jylla bad ka Iingkashari?. Lada ka Sorkar hi kam lah ban leh eiei, ka paw ba ka dei ka jingpynap shrip bala pynap bala pynap lypa”.
